امریکہ کے صدر ڈونلڈ ٹرمپ نے ملک کے 250 ویں یومِ آزادی کے موقع پر آئیووا اسٹیٹ فیئر گراؤنڈز میں عوامی اجتماع سے خطاب کرتے ہوئے دعویٰ کیا ہے کہ انہوں نے دنیا میں پانچ بڑی جنگوں کو رکوا کر عالمی امن کے قیام میں اہم کردار ادا کیا ہے، اور اسی بنیاد پر وہ نوبل امن انعام کے سب سے موزوں امیدوار ہیں۔
صدر ٹرمپ نے اپنی تقریر میں کہا کہ ان کی قیادت میں نہ صرف امریکہ کی پوزیشن مضبوط ہوئی بلکہ دنیا بھر میں جاری سنگین تنازعات میں بھی کمی آئی۔ انہوں نے دعویٰ کیا کہ ان کی کوششوں سے پاکستان اور بھارت کے درمیان ممکنہ ایٹمی تصادم ٹالا گیا، جبکہ افریقہ میں کانگو اور روانڈا کے درمیان 30 سال سے جاری خانہ جنگی کا خاتمہ ممکن ہوا۔ اس کے علاوہ انہوں نے کوسووو اور سربیا کے درمیان کشیدگی کم کرنے میں بھی اہم کردار ادا کرنے کا دعویٰ کیا۔
ان کا کہنا تھا کہ ان اقدامات سے لاکھوں جانیں بچائی گئیں اور دنیا ایک بڑے بحران سے محفوظ رہی۔ صدر ٹرمپ نے اپنی تقریر میں اس بات پر زور دیا کہ ان کی امن کوششوں کو نظرانداز نہیں کیا جانا چاہیے اور عالمی برادری کو انہیں نوبل امن انعام کے لیے سنجیدگی سے لینا چاہیے۔
