لیورپول / میڈرڈ، عالمی شہرت یافتہ پرتگالی فٹبالر اور انگلش کلب لیورپول کے اسٹار کھلاڑی ڈیاگو جوتا اسپین میں ایک المناک ٹریفک حادثے میں جاں بحق ہو گئے۔ اسپینش میڈیا رپورٹس کے مطابق یہ ہولناک حادثہ جمعرات کی صبح شمالی اسپین میں پیش آیا، جس میں جوتا کے ہمراہ ان کے چھوٹے بھائی آندرے سوا بھی جاں بحق ہو گئے۔
28 سالہ ڈیاگو جوتا حال ہی میں یورپی فٹبال کے دو بڑے اعزازات کا حصہ رہے۔ وہ گزشتہ ماہ یوئیفا نیشنز لیگ جیتنے والی پرتگالی ٹیم کے اہم رکن تھے، جبکہ اس سال انہوں نے انگلش پریمیئر لیگ میں لیورپول کی نمائندگی کرتے ہوئے اپنی ٹیم کو چیمپیئن بنوانے میں بھی کلیدی کردار ادا کیا۔ ان کی بہترین پرفارمنس، رفتار اور گول اسکورنگ کی مہارت نے انہیں دنیا بھر میں بے شمار مداح عطا کیے۔
ان کے بھائی آندرے سوا، جو پرتگال کی سیکنڈ ڈویژن لیگ میں سرگرم کھلاڑی تھے، بھی اس حادثے میں زندگی کی بازی ہار گئے۔ دونوں بھائیوں کی ناگہانی موت نے فٹبال کی عالمی برادری کو گہرے دکھ میں مبتلا کر دیا ہے۔ لیورپول فٹبال کلب، پرتگالی فٹبال فیڈریشن، سابق اور موجودہ کھلاڑیوں سمیت دنیا بھر سے فٹبال شائقین نے سوشل میڈیا پر اظہار افسوس کیا ہے۔
لیورپول کلب نے اپنے تعزیتی بیان میں کہا ہے کہ ’’ہم ایک عظیم کھلاڑی، باصلاحیت ساتھی اور شاندار انسان سے محروم ہو گئے ہیں۔ ڈیاگو جوتا کی خدمات اور وراثت ہمیشہ ہمارے دلوں میں زندہ رہے گی۔‘‘
یاد رہے کہ** ڈیاگو جوتا نے نہ صرف پرتگال بلکہ بین الاقوامی فٹبال میں بھی اپنی صلاحیتوں کا لوہا منوایا تھا۔ ان کی ناگہانی موت صرف پرتگال کے لیے نہیں، بلکہ عالمی فٹبال کمیونٹی کے لیے ایک ناقابل تلافی نقصان ہے۔
