تھانہ ٹانڈا، ضلع گجرات کے علاقے بھاگووال میں ایک روز قبل پولیس کانسٹیبل محمد اویس پر فائرنگ کرنے والے دو ملزمان گزشتہ شب پولیس مقابلے میں ہلاک ہو گئے۔ پولیس کے مطابق، ہلاک ہونے والے ملزمان کی شناخت سجاد علی اور فاروق حسین کے نام سے ہوئی ہے۔
واقعہ اس وقت پیش آیا جب محمد اویس ڈیوٹی کے دوران ڈاکوؤں کی فائرنگ سے شدید زخمی ہو گئے تھے۔ اس واقعے کے بعد گجرات پولیس نے سی سی ڈی (کرائم کنٹرول ڈپارٹمنٹ) کی مدد سے سرچ آپریشن شروع کیا۔ گزشتہ رات بھاگووال میں مشتبہ افراد کے ساتھ پولیس کا آمنا سامنا ہوا، جو جلد ہی ایک مقابلے میں تبدیل ہو گیا۔
دونوں ملزمان سجاد علی اور فاروق حسین نہ صرف محمد اویس پر فائرنگ کے واقعے میں ملوث تھے بلکہ ان کے خلاف منشیات فروشی کے کئی مقدمات بھی درج تھے۔ دونوں افراد کا تعلق جرائم پیشہ نیٹ ورک سے بتایا جا رہا ہے، جو علاقے میں منشیات کی ترسیل اور دیگر غیر قانونی سرگرمیوں میں ملوث تھے۔
