اسلام آباد، پاکستان تحریک انصاف کے بانی چیئرمین عمران خان نے ایک بار پھر پولی گرافک ٹیسٹ کروانے سے انکار کرتے ہوئے لاہور پولیس کی ٹیم سے کسی بھی قسم کے تعاون سے گریز کیا۔
نجی نیوز چینل کے مطابق لاہور پولیس کی خصوصی ٹیم عدالتی حکم پر 9 مئی کے مقدمات کی تفتیش کے سلسلے میں پولی گرافک ٹیسٹ کے لیے اڈیالہ جیل پہنچی، تاہم عمران خان نے تفتیش میں تعاون سے صاف انکار کر دیا اور جیل میں پیش بھی نہ ہوئے۔
ذرائع کے مطابق، عمران خان کے انکار کے باعث ٹیم فوٹو گرامیٹک اور وائس میچنگ جیسے دیگر ٹیسٹ بھی نہ کر سکی۔ پولیس ٹیم جیل میں چار گھنٹے تک انتظار کے بعد واپس روانہ ہو گئی۔
یہ چوتھی مرتبہ ہے جب بانی پی ٹی آئی عمران خان نے پولی گرافک ٹیسٹ سے انکار کیا، ٹیم کی قیادت ڈی ایس پی آصف جاوید کر رہے تھے جبکہ پنجاب فرانزک سائنس ایجنسی کے ماہرین بھی ان کے ہمراہ تھے۔
واضح رہے کہ عمران خان نے پہلے بھی پولی گرافک ٹیسٹ کروانے سے انکار کیا تھا، جس کی تفصیلات آپ یہاں پڑھ سکتے ہیں۔
یاد رہے کہ عدالت کے حکم پر یہ ٹیسٹ 9 مئی کے ہنگامہ خیز واقعات میں عمران خان کے کردار کی تحقیقات کے لیے تجویز کیا گیا تھا، تاہم اب تک وہ ہر بار اس سے انکار کرتے آئے ہیں۔
