اسلام آباد، پاک فوج نے صرف پانچ گھنٹوں میں بھارت کے جنگی غرور کو خاک میں ملا دیا اور انتہائی کم وقت میں فیصلہ کن برتری حاصل کرتے ہوئے دشمن کو گھٹنے ٹیکنے پر مجبور کر دیا۔
پاکستانی فوج نے بھارت کے متعدد اہداف کو نشانہ بنایا اور ادھم پور ایئربیس، پٹھان کوٹ، سرسہ، سورت گڑھ، برنالہ، بھٹنڈا، سسرام، جموں، اکھنور، آدام پور، ہلوارا، مامون ایئرفیلڈز، براہموس سٹوریج سائٹ، بھارتی بریگیڈ ہیڈکوارٹر کے جی ٹاپ اور اڑی میں سپلائی ڈپو سمیت 12 اہداف کو تباہ کیا۔
پیشہ ورانہ مہارت کا شاہکار
پاکستانی مسلح افواج نے محض پانچ گھنٹوں میں بھارت کو زبردست ضرب دی، جس سے بھارت کا جنگی غرور مٹی میں مل گیا، یہ کارروائیاں اعلیٰ تربیت، جدید ٹیکنالوجی اور فوری فیصلہ سازی کا واضح ثبوت ہیں۔
S-400 کا خاتمہ: بھارت کی فضائی دفاعی صلاحیت کا خاتمہ
پاکستان ایئر فورس کے JF-17 تھنڈر ہائپرسونک میزائلوں نے بھارت کے جدید S-400 ایئر ڈیفنس سسٹم کو آدم پور میں تباہ کر دیا، جس کی قیمت تقریباً 1.5 ارب ڈالر تھی۔
سائبر محاذ پر مکمل کنٹرول:
پاکستانی سائبر ماہرین نے بھارت کی متعدد اہم ویب سائٹس، جن میں بی جے پی کی آفیشل ویب سائٹ، کرائم ریسرچ انویسٹیگیشن ایجنسی، بھارت ارتھ موورز لمیٹڈ، ہندوستان ایروناٹکس لمیٹڈ اور کئی سرکاری کیمروں کو ہیک کر لیا، اس کے علاوہ، بھارت کے 70 فیصد بجلی کا نظام معطل کر دیا گیا، جس سے دشمن کا مواصلاتی اور دفاعی نظام متاثر ہو گیا۔
بری اور فضائی اہداف پر کاری ضرب:
پاک فوج نے دہرانگیاری میں بھارتی توپ خانہ تباہ کیا، ناگروٹا میں براہموس میزائل ذخیرہ تباہ کیا، اور اڑی فیلڈ سپلائی ڈپو کو مکمل طور پر تباہ کر دیا، سکیورٹی ذرائع کے مطابق بھمبر گلی (IIOJK) میں بھارتی بریگیڈ ہیڈکوارٹرز اور سرسا ایئر فیلڈ سمیت کئی فضائی اڈے مکمل طور پر تباہ کر دیے گئے۔
لائن آف کنٹرول پر بھارتی چوکیاں تباہ:
پاکستانی مسلح افواج نے نیزہ پیر سیکٹر میں بھارتی چوکیاں تباہ کر دیں، جن میں دھرم سال 1، دانہ 1 اور ٹیبل ٹاپ پوسٹس شامل ہیں۔
بھارت کی جنگی صلاحیت پر فیصلہ کن ضرب:
پاکستان نے صرف چند گھنٹوں میں بھارت کے دفاعی نظام، فضائی طاقت، سپلائی لائن اور سائبر نیٹ ورک کو تباہ کر کے دکھایا، اس آپریشن نے نہ صرف زمینی بلکہ الیکٹرانک جنگ میں بھی پاکستان کی برتری کو واضح کر دیا۔
پاکستان کا پیغام:
پاکستان ہر قدم پر بھارتی جارحیت کا منہ توڑ جواب دے گا اور پاکستانی مسلح افواج دشمن کے ہر حملے کو ناکام بنانے کی بھرپور صلاحیت رکھتی ہیں۔
