امریکہ کے باہر تیار ہونیوالی فلموں پر 100 فیصد ٹیرف لگانے کا فیصلہ

واشنگٹن، امریکی صدر ڈونلڈ ٹرمپ نے اعلان کیا ہے کہ اب امریکا کے باہر تیار ہونے والی تمام فلموں پر 100 فیصد ٹیرف لاگو کیا جائے گا۔

صدر ٹرمپ نے آٹو موبائل، اسٹیل اور دیگر درآمدی اشیا پر محصولات عائد کرنے کے بعد اب غیر ملکی فلموں کو بھی اس فہرست میں شامل کر لیا ہے۔

عالمی میڈیا رپورٹس کے مطابق، ٹرمپ نے اپنے سوشل میڈیا پلیٹ فارم ’ٹروتھ سوشل‘ پر جاری کردہ پیغام میں کہا کہ امریکی فلم انڈسٹری تیزی سے زوال کا شکار ہو رہی ہے، جس کی بحالی کے لیے وہ محکمہ تجارت کو غیر ملکی فلموں پر لیوی نافذ کرنے کی اجازت دے رہے ہیں۔

انہوں نے کہا کہ دیگر ممالک اپنے فلم سازوں اور اداروں کو امریکی فلمی صنعت سے دور کرنے کے لیے پرکشش مراعات دے رہے ہیں، جو امریکا کی ثقافتی اور معاشی سلامتی کے لیے خطرہ بن سکتا ہے، ٹرمپ نے زور دیا کہ ہمیں امریکی سرزمین پر بننے والی فلموں کو فروغ دینا ہے۔