تہران، ایران نے امریکی صدر ڈونلڈ ٹرمپ کے جارحانہ اور غیر ذمہ دارانہ بیانات کے خلاف اقوام متحدہ کی سلامتی کونسل میں باضابطہ شکایت درج کرادی۔
ایران نے ان بیانات کو بین الاقوامی قوانین اور اقوام متحدہ کے چارٹر کی کھلی خلاف ورزی قرار دیا ہے۔
اقوام متحدہ میں ایران کے سفیر امیر سعید ایروانی نے اپنے خط میں خبردار کیا کہ اگر امریکا یا اسرائیل نے ایران پر کسی بھی قسم کا حملہ کیا تو فوری اور فیصلہ کن ردعمل دیا جائے گا۔
واضح رہے کہ ٹرمپ نے اتوار کے روز ایران کو دھمکی دی تھی کہ اگر تہران نے اپنے جوہری پروگرام پر واشنگٹن کے ساتھ معاہدہ نہ کیا تو اسے بمباری اور مزید پابندیوں کا سامنا کرنا پڑے گا۔
اس پر ایران کے سپریم لیڈر آیت اللہ خامنہ ای نے سخت ردعمل دیتے ہوئے کہا کہ امریکا اور اسرائیل کی دشمنی کوئی نئی بات نہیں، اگر امریکا نے ایران کے خلاف کسی بھی اقدام کی کوشش کی تو اسے سخت جوابی دھچکا پہنچے گا۔
آیت اللہ خامنہ ای نے مزید کہا کہ اگر امریکا نے پہلے کی طرح ایران میں بغاوت کی کوشش کی تو ایرانی عوام خود اس کا بھرپور جواب دے گی۔
