پاکستانی اداکارہ نازش جہانگیر کی جانب سے انکشاف کیاگیا کہ تقریباً 5 سال پہلے کراچی میں گر کر تباہ ہونے والے طیارے میں انہیں بھی سوار ہونا تھا لیکن انکی فلائٹ مِس ہوگئی تھی۔
حال ہی میں ایک پوڈکاسٹ کے دوران اداکارہ کی جانب سے واقعہ کے تقریباً 5 سال بعد دعویٰ کیاگیا ہے کہ لاہور سے کراچی آنے والا پاکستان انٹرنیشنل ائیرلائنز کا طیارہ جو 2020 میں کراچی کے علاقے ماڈل کالونی میں آبادی پر گرکر تباہ ہوگیا تھا، اس میں انہیں بھی کراچی آنا تھا لیکن چند وجوہات کی بنا پر ان سے پرواز چھوٹ گئی تھی۔
اداکارہ کی جانب سے بتایا گیا ہے کہ ان کا پہلا فضائی سفر والدین کے ہمراہ سعودی عرب کا تھا جب کہ خود اپنے اخراجات پر انہوں نے سہیلیوں کے ہمراہ مالدیپ کا پہلا سفر کیا تھا، جب پہلی بار وہ وفاقی دارالحکومت اسلام آباد سے کراچی کے ائیرپورٹ پر اتریں تو انہیں کراچی اچھا نہیں لگا لیکن اب انہیں کراچی اچھا لگنے لگا ہے۔
خوبرو اداکارہ نے کہا کہ ان سے متعدد وجوہات کی بنا پر پروازیں چھوٹ جاتی ہیں، وہ کوشش کرتی ہیں کہ ایسا نہ ہو لیکن اس کے باوجود ان سے متعدد پروازیں چھوٹ جاتی ہیں۔
اداکارہ کی جانب سے انکشاف کیا گیا کہ ایک ہی دن میں ان سے 6 پروازیں بھی چھوٹیں جو کہ اسلام آباد سے کراچی کی تھیں اور ہر بار کوشش کے باوجود وہ وقت پر نہیں پہنچ پائیں۔
اسی دوران اداکارہ نے یاد کرتے ہوئے بتایا کہ کورونا کے لاک ڈاؤن کے بعد صوبائی دارلحکومت کراچی میں گر کر تباہ ہونے والی پرواز بھی ان سے چھوٹ گئی تھی۔
مذکورہ پرواز میں ان کا بھی ٹکٹ تھا اور انہیں بھی 60 دن قرنطینہ میں رہنے کے بعد کراچی جانا تھا لیکن وہ جا نہ سکیں۔
نازش جہانگیر کی جانب سے شکر ادا کرتے ہوئے کہا گیا کہ حادثے کا سننے کے بعد انہوں نے شکر ادا کیا کہ وہ نہیں گئیں۔
