سینئر رہنما پاکستان پیپلز پارٹی ندیم افضل چن کا کہنا ہے کہ شریف خاندان کا حسن نواز کے دیوالیہ ہونے پر بھٹو دور کو زیر بحث لانا درست نہیں۔
اپنے ردعمل میں ندیم افضل چن کا کہنا تھا کہ دیوالیہ آپ آج ہو رہے ہیں اور وہ بھی برطانیہ میں تو اس میں بھٹو دور کہاں سے بیچ میں آ گیا؟
ندیم افضل چن کی جانب سے شریف خاندان کو مخاطب کرتے ہوئے کہا گیا کہ قوم کو حقیقت بتائیں کہ آپ نے اپنے آپ کو اس لیے دیوالیہ ظاہر کر دیا تاکہ برطانیہ میں ٹیکس ادا نہ کرنا پڑے، جو کرتوت یہاں پر ہیں وہی وہاں پر ہیں، کچھ تو حیا کریں۔
ندیم افضل چن نے کہا کہ اگر انہیں پیپلز پارٹی کی قیادت نہ روکے تو وہ سارا کچا چٹھا کھول کر رکھ دیں گے۔
واضح رہے کہ نواز شریف کے بیٹے حسن نواز کی کمپنی کو لندن ہائی کورٹ کی جانب سے دیوالیہ قرار دینے پر شریف فیملی نے ردعمل کا اظہار کیا ہے۔
ترجمان شریف فیملی کا کہنا ہے کہ دیوالیہ کرنے کا عمل 1972 سے شروع ہوا تھا، جب ذوالفقار بھٹو نے صنعتیں نیشنلائز کیں، متاثرین میں شریف خاندان بھی شامل تھا۔
ترجمان کے مطابق پھر جنرل پرویز مشرف نے شریف خاندان کی فیکٹریاں سیل کیں، گھروں پر قبضہ کیا، ثاقب نثار کے دور میں بھی شریف خاندان کی صنعتوں کو تباہ کیا گیا۔
