اسلام آباد، رہنما پی ٹی آئی اور اپوزیشن لیڈر عمر ایوب کا کہنا ہے کہ مذاکرات کے بارے میں ہمارا بڑا کلیئر بیانیہ آچکا ہے، عمران خان، شاہ محمود قریشی اور تمام اسیران کو فوری رہا کیا جائے۔
میڈیا سے غیر رسمی گفتگو کے دوران تحریک انصاف کے رہنما عمرایوب کا کہنا تھا کہ 9 مئی اور 26 نومبر کمیشن کے بارے حکومت کو بتایا ہے، ہم نے یہ بھی کہا ہے کہ عمران خان تک ہماری رسائی ہونی چاہیے۔
عمر ایوب نے کہا کہ سابق وزیراعظم پر کوئی کیس بنتا ہی نہیں، انہوں نے عمران خان کو غیر قانونی طور پر جیل میں رکھا ہوا ہے، جب تک ملک میں آئین و قانون کی بالادستی نہیں ہوگی تو یہی حساب چلے گا۔
عمرایوب کا کہنا تھا کہ پاکستان کہاں ترقی کررہا ہے؟ بانی پی ٹی آئی کہتے ہیں آئین و قانون کی بالادستی ہونی چاہیے، گیس تو بہت دور کی بات ہے یہاں سے اناج غائب ہوگیا ہے، سردیوں میں لوڈشیڈنگ ہو رہی ہے پیچھے کیا رہ گیا ہے۔
دوسری جانب وزیر اعلیٰ خیبر پختونخوا علی امین گنڈا پور نے کہا کہ وزیراعظم شہباز شریف کی اس طرح کی بات چیت کرنا نامناسب ہے کہ احتجاج میں گولی نہیں چلی، اس طرح کی باتوں سے اجتناب کرنا چاہیے۔
اسلام آباد میں میڈیا سے گفتگو کے دوران وزیراعلیٰ خیبر پختونخوا علی امین گنڈا پور نے کہا کہ 26 نومبر کی بات وزیراعظم نے خود کی، علی امین گنڈا پور کا کہنا ہے کہ 58 زخمی اور 13 شہید ہیں، 45 تاحال لاپتہ ہیں لیکن وزیراعظم کی اس طرح کی بات چیت کرنا نامناسب ہے کہ وفاقی دارلحکومت میں احتجاج کے دوران گولی نہیں چلی۔
