اسرائیلی فوج نے غزہ کے جبالیہ کیمپ میں روٹی کی خاطر قطار میں لگے افراد کو نشانہ بناکر مزید 8 فلسطینیوں کو شہید کردیا۔
غیر ملکی میڈیا کے مطابق اسرائیلی فورسز کی جانب سے جبالیہ کے امدادی مرکز پر روٹی کی خاطر قطار میں لگے افراد کو نشانہ بنایا گیا، جس میں 8 اور اسرائیلی حملوں میں مجموعی طور پر 50 فلسطینی شہید ہوگئے۔
دوسری جانب مقبوضہ مغربی کنارے پر کئی روز سے جاری آپریشن کے دوران اسرائیلی فورسز کی جانب سے صحافیوں پر بھی حملے کیے ہیں۔
پچھلے روز مقبوضہ مغربی کنارے پر آپریشن میں اسلامی جہاد کے ارکان سمیت 29 فلسطینی شہید ہوگئے تھے۔
دوسری جانب افغانستان کے دارالحکومت کابل میں خودکش حملے میں 6 افراد جان کی بازی ہار گئے جبکہ حملے میں 13 زخمی ہوگئے۔
ترجمان کابل پولیس لد زدران نے ایکس پربیان جاری کرتے ہوئے کہا کہ جنوبی کابل کے علاقے قلعہ بختیار میں خودکش حملہ آور نے خود کو دھماکے سے اڑا دیا، جس سے 1 خاتون سمیت 6 افراد جان کی بازی ہار گئے اور اس افسوسناک حملے میں 13 زخمی بھی ہوگئے۔
ترجمان کے مطابق دھماکے کی تحقیقات تاحال جاری ہیں، ابھی کسی گروپ کی جانب سے دھماکے کی ذمہ داری قبول نہیں کی گئی۔
