حماس کے اسرائیلی فوج پر حملے کے نتیجے میں 4 فوجی اہلکار ہلاک ہوچکے ہیں۔
فلسطینی مزاحمتی تحریک حماس کی جانب سے غزہ میں اسرائیلی فورسز پر حملہ کر کے قابض صیہونی فوج کو بھاری جانی و مالی نقصان پہنچایا گیا ہے۔
غزہ میں 7 اکتوبر سے اسرائیلی حملے جاری ہیں جس میں اب تک تقریباََ 41 ہزار سے زائد فلسطینی شہید اور1 لاکھ سے زائد زخمی ہو چکے ہیں، غزہ کا انفراسٹرکچر مکمل طور پر برباد ہو چکا ہے جس کی وجہ سے غزہ کے شہری مغربی کنارے میں قائم پناہ گزین کیمپوں میں رہنے پر مجبور ہیں۔
اسرائیلی فورسز کی جانب سے غزہ پر مسلسل بمباری کا سلسلہ جاری ہے اور تمام تر کوششوں کے باوجود اپنے یرغمالیوں کو چھڑوانے میں اب تک ناکام رہی ہیں، جس پر اسرائیلی وزیراعظم نیتن یاہو کو اپنی ہی عوام کے شدید احتجاج کا سامنا کرنا پڑ رہا ہے۔
اطلاعات کے مطابق جنوبی غزہ کے علاقے رفح میں حماس کے اسرائیلی فوج پر حملے جاری ہیں اور تازہ ترین حملے میں صیہونی فوج کو بھاری جانی نقصان اٹھانا پڑا ہے۔
غیر ملکی میڈیا کے مطابق اسرائیلی فورسز کی جانب سے رفح میں 4 فوجیوں کی ہلاکت کی تصدیق کردی گئی ہے، حملے میں گیواتی بریگیڈ کے ڈپٹی کمپنی کمانڈر اور خاتون سمیت 4 فوجی ہلاک ہوئے۔
اسرائیل کی ڈیفنس فورس نے حملے میں 3 فوجیوں کے شدید زخمی اور 2 کے معمولی زخمی ہونے کی تصدیق کرتے ہوئے یہ بتایا ہے کہ اسرائیلی فوجی عمارت میں چھپائے گئے بارودی مواد کے دھماکے میں ہلاک اور زخمی ہوئے۔
