دبئی ائیرپورٹ پر نئے اے آئی کوریڈور سے مسافر دستاویزات دکھائے بغیر چند سیکنڈ میں امیگریشن کلیئرنس حاصل کر سکیں گے۔
دبئی ائیرپورٹ نے دنیا کا پہلا اے آئی پسنجر کوریڈور متعارف کروایا ہے، جس کے ذریعے مسافروں کو روایتی پاسپورٹ اور امیگریشن مراحل میں وقت ضائع کرنے کی ضرورت نہیں ہوگی۔
اس سسٹم میں جدید اے آئی ٹیکنالوجی مسافروں کے بائیو میٹرک اور ڈیجیٹل ڈیٹا کی بنیاد پر شناخت کرے گی اور کسی بھی بے ضابطگی کی صورت میں فوری طور پر عمل کو حکام کے حوالے کر دے گی۔
’ریڈ کارپٹ‘ کے نام سے جانے جانے والی اس راہداری میں ایک وقت میں دس مسافروں کی شناخت مکمل کی جا سکے گی، جس سے نہ صرف وقت کی بچت ہوگی بلکہ سفر کا تجربہ بھی تیز اور محفوظ ہو جائے گا۔
اے آئی سسٹم کی بدولت امیگریشن کلیئرنس چند سیکنڈز میں مکمل ہو جائے گا، جو روایتی پاسپورٹ کنٹرول پر کئی منٹ لیتا ہے۔ دبئی حکام اس ٹیکنالوجی کو اسمارٹ ٹریول کے لیے اہم قدم قرار دیتے ہیں، اور یہ مستقبل میں عالمی ہوائی اڈوں کے لیے ایک نیا معیار قائم کر سکتی ہے۔
