اسرائیلی وزیراعظم نیتن یاہو کا کہنا ہے کہ ایران کے جوہری پروگرام اور بیلسٹک میزائل خطرات کے خاتمے کا ہدف قریب ہے، مقاصد مکمل ہوتے ہی کارروائی روک دی جائے گی۔
تل ابیب: اسرائیل کے وزیراعظم بنجمن نیتن یاہو نے کہا ہے کہ اسرائیل ایران کے دو بڑے خطرات، یعنی جوہری پروگرام اور بیلسٹک میزائلوں کے خاتمے کے ہدف کے بہت قریب پہنچ چکا ہے، اور جیسے ہی یہ مقاصد مکمل ہوں گے، جاری عسکری کارروائی ختم کر دی جائے گی۔ اسرائیلی میڈیا سے گفتگو کرتے ہوئے انہوں نے واضح کیا کہ اسرائیل کو کسی طویل المدتی یا تھکا دینے والی جنگ میں دھکیلنے کا کوئی ارادہ نہیں، مگر یہ مہم وقت سے پہلے بھی ختم نہیں کی جائے گی۔
نیتن یاہو نے کہا کہ ہم اپنے اقدامات کو اس حد تک ہی لے جائیں گے جو ضروری ہے، نہ اس سے آگے اور نہ بہت جلد ختم کریں گے۔ انہوں نے دعویٰ کیا کہ ایرانی حکومت اسرائیل کے وجود کو ختم کرنا چاہتی ہے، اسی لیے اسرائیل نے یہ فیصلہ کن آپریشن شروع کیا تاکہ جوہری خطرے اور بیلسٹک میزائل حملوں جیسے دو بنیادی خطرات کا مستقل خاتمہ کیا جا سکے۔
انہوں نے مزید کہا کہ امریکی بنکر بسٹر بموں کے ذریعے ایران کے "فردو” جوہری مرکز کو راتوں رات بہت نقصان پہنچایا گیا ہے، تاہم اس نقصان کی درست حد کا اندازہ ابھی لگایا جانا باقی ہے۔ نیتن یاہو نے ایران کے 60 فیصد افزودہ یورینیم کے ذخیرے سے متعلق سوال کے جواب میں کہا کہ اسرائیل اس پہلو پر خاص طور پر نظر رکھے ہوئے ہے کیونکہ یہ ایران کے جوہری پروگرام کا ایک نہایت اہم جزو ہے۔ ان کے بقول، اسرائیل کے پاس اس حوالے سے “دلچسپ معلومات” موجود ہیں۔
نیتن یاہو نے کہا کہ اگرچہ یہ عنصر واحد نہیں، مگر ایران کے ایٹمی عزائم کو سمجھنے کے لیے یہ نہایت کلیدی اہمیت رکھتا ہے، اور اسرائیل اس بارے میں کسی بھی خطرے کو نظر انداز نہیں کرے گا۔
یاد رہے کہ حالیہ دنوں میں امریکا کی جانب سے ایران پر فضائی حملوں کے بعد اسرائیل نے بھی ایران کی جوہری تنصیبات پر توجہ مرکوز کرتے ہوئے کارروائیاں تیز کر دی ہیں۔ اسرائیل اور ایران کے مابین بڑھتی کشیدگی نے مشرقِ وسطیٰ میں ایک نئے بحران کو جنم دے دیا ہے، جس کے اثرات عالمی سیاست، توانائی اور سلامتی پر گہرے پڑنے کا خدشہ ہے۔
