تاشقند: ازبکستان نے بحرین، کویت، عمان اور خود اپنے شہریوں کے لیے 30 دن کی ویزا فری انٹری کا اعلان کیا ہے۔ یہ فیصلہ سیاحت کے فروغ اور غیر ملکی مہمانوں کی آمد کو آسان بنانے کے لیے صدارتی حکم نامے کے تحت کیا گیا ہے۔
ازبک وزارت انصاف کے مطابق، اس اقدام کا مقصد 2025 کے آخر تک 15.8 ملین غیر ملکی سیاحوں کو راغب کرنا اور سیاحتی خدمات کی برآمدات کو 4 ارب ڈالر تک لے جانا ہے۔ یہ پالیسی 15 مئی کو جاری کردہ صدارتی فرمان کے تحت لاگو کی گئی ہے۔
حکام نے 2025 میں 40 ملین گھریلو سیاحوں کا ہدف بھی مقرر کیا ہے۔ اس مقصد کے لیے ملک بھر میں 378 نئے ٹور آپریٹرز کا آغاز متوقع ہے، جو سیاحتی سہولیات کو مزید بہتر بنائیں گے۔
حکومت نے اعلان کیا ہے کہ ہر سال نومبر میں "بین الاقوامی سیاحتی ہفتہ” منایا جائے گا، جس میں دنیا بھر سے سیاحوں، ماہرین اور کاروباری نمائندوں کی شرکت متوقع ہے۔
ازبکستان کی پاکستان سے بڑھتی ہوئی دوطرفہ سرگرمیاں صرف سیاحت تک محدود نہیں بلکہ حالیہ دفاعی سطح پر ملاقات اس تعاون کی ایک اور مثال ہے۔
