بھارتی ریاست اتر پردیش کے شہر بلند شہر میں ٹریکٹر ٹرالی اور ٹرک کے درمیان تصادم میں 8 ہندو یاتری ہلاک، 12 بچے سمیت 40 زخمی۔
بھارت، بھارتی ریاست اتر پردیش کے شہر بلند شہر میں ایک دلخراش حادثہ پیش آیا جب یاتریوں کو لے جانے والی ٹریکٹر ٹرالی کو پیچھے سے ٹرک نے ٹکر مار دی، جس کے نتیجے میں 8 ہندو یاتری ہلاک اور 40 افراد زخمی ہو گئے، جن میں 12 بچے شامل ہیں۔
زخمیوں کو فوری طور پر اسپتال منتقل کیا گیا، جہاں کچھ کی حالت تشویشناک بتائی گئی ہے۔ ٹریکٹر ٹرالی میں کل 61 افراد سوار تھے جو کسگنج کے رفت پور گاؤں سے جہرپیر، راجستھان جا رہے تھے۔
یہ حادثہ گزشتہ روز بھارتی پنجاب کے علاقے ہوشیار پور میں مسافر وین اور ایل پی جی ٹینکر کے تصادم کے بعد ایک اور سنگین حادثہ ہے، جس میں 7 افراد جاں بحق ہوئے تھے، حکام نے متاثرہ خاندانوں کو فوری طبی امداد فراہم کرنے کے اقدامات شروع کر دیے ہیں اور زخمیوں کے بہتر علاج کے لیے اسپتالوں میں سہولیات بڑھا دی گئی ہیں۔
یاد رہے کہ بھارت میں یاتریوں اور مسافر وینوں کے ساتھ ہونے والے ٹریفک حادثات میں انسانی جانوں کا نقصان بڑھ رہا ہے، جس پر سڑکوں پر حفاظتی اقدامات کو مزید مؤثر بنانے کی ضرورت ہے۔
