امریکا کے وزیر خزانہ سکاٹ بیسنٹ نے بھارت پر تجارتی مذاکرات میں رکاوٹ ڈالنے کا الزام عائد کرتے ہوئے کہا ہے کہ بھارت مسلسل ہٹ دھرمی کر رہا ہے۔
واشنگٹن سے موصولہ رپورٹ کے مطابق امریکی وزیر خزانہ سکاٹ بیسنٹ نے بھارت پر سخت تنقید کرتے ہوئے کہا ہے کہ بھارت امریکا کے ساتھ جاری تجارتی مذاکرات میں مسلسل ہٹ دھرمی کا مظاہرہ کر رہا ہے جس کی وجہ سے معاملات آگے نہیں بڑھ پا رہے۔
انہوں نے غیر ملکی میڈیا کو دیئے گئے انٹرویو میں بتایا کہ سوئٹزرلینڈ اور بھارت سمیت کئی دیگر ممالک کے ساتھ تجارتی معاہدے ابھی مکمل ہونے ہیں اور امید کی جارہی ہے کہ ٹرمپ انتظامیہ اکتوبر کے آخر تک ان مذاکرات کو حتمی شکل دے دے گی، تاہم بھارت کا رویہ اس عمل میں رکاوٹ بن رہا ہے۔
اس کے علاوہ امریکی حکام اگلے دو سے تین ماہ میں چینی حکام سے ملاقات کرنے کا ارادہ رکھتے ہیں جس میں دونوں ممالک کے معاشی تعلقات کے مستقبل پر تبادلہ خیال کیا جائے گا۔
دوسری جانب امریکی محکمہ خارجہ کی ترجمان ٹیمی بروس نے پاکستان اور بھارت کے درمیان حالیہ کشیدگی پر بات کرتے ہوئے کہا کہ صورتحال بگڑنے کا امکان تھا لیکن امریکی قیادت کی بروقت کوششوں سے ممکنہ تباہی کو روک دیا گیا۔
انہوں نے کہا کہ امریکا دونوں ممالک کے ساتھ اپنے تعلقات کو مضبوط سمجھتا ہے اور خطے میں امن قائم رکھنے کے لیے تعاون جاری رکھے گا۔
واضح رہے کہ امریکی صدر ڈونلڈ ٹرمپ نے بھارت پر مزید 25 فیصد ٹیرف عائد کیا ہے جس کے بعد مجموعی امریکی ٹیرف کی شرح 50 فیصد تک پہنچ گئی ہے۔
یاد رہے کہ امریکا اور بھارت کے درمیان تجارتی تعلقات میں بڑھتی ہوئی تناؤ عالمی معیشت اور خطے کے سیاسی ماحول پر بھی اثر انداز ہو رہی ہے۔
