امریکا نے وائٹ ہاؤس کے قریب فائرنگ کے واقعے کے بعد افغان شہریوں کی امیگریشن درخواستیں غیر معینہ مدت کے لیے معطل کر دی ہیں۔ واشنگٹن میں نیشنل گارڈز پر حملے میں دو اہلکار شدید زخمی ہوئے تھے، جس کے بعد ٹرمپ انتظامیہ نے فوری اقدامات کیے۔
امریکی میڈیا کے مطابق گرفتار مشتبہ شخص کی شناخت 29 سالہ افغان شہری رحمان اللہ لکنوال کے طور پر ہوئی ہے، جس پر الزام ہے کہ اس نے نیشنل گارڈ کے دو اہلکاروں پر فائرنگ کی۔ زخمی اہلکاروں کی حالت اب بھی تشویشناک بتائی جا رہی ہے۔
امریکی سیٹیزن شپ اینڈ امیگریشن سروس نے سوشل میڈیا پلیٹ فارم ایکس پر جاری بیان میں کہا کہ افغان شہریوں کی تمام امیگریشن درخواستوں کا مکمل سکیورٹی جائزہ لیا جائے گا، جس کے باعث یہ درخواستیں وقتی طور پر معطل کر دی گئی ہیں۔
ایجنسی کے مطابق سکیورٹی پروٹوکول اور جانچ کے نظام کا دوبارہ جائزہ لینے کے بعد ہی درخواستوں کی بحالی سے متعلق فیصلہ کیا جائے گا۔
