واشنگٹن، امریکی وزیر خارجہ مارکو روبیو نے بھارتی ہم منصب جے شنکر سے رابطہ کر کے پاک بھارت کشیدگی میں کمی کے لیے امریکہ کی جانب سے ثالثی کی پیشکش کی ہے۔
مارکو روبیو نے بات چیت میں زور دیا کہ دونوں ممالک کو براہ راست روابط بحال کرنے اور کشیدہ صورتحال کو کم کرنے کے لیے عملی اقدامات کرنا ہوں گے۔
انہوں نے کہا کہ امریکہ خطے میں امن قائم رکھنے کے لیے ہر ممکن تعاون فراہم کرنے کو تیار ہے اور مذاکرات کے عمل میں بھی کردار ادا کر سکتا ہے۔
یاد رہے کہ حالیہ کشیدگی میں بھارت نے جارحانہ اقدام اٹھا کر خود کو ہی نقصان پہنچایا ہے، جبکہ پاکستان کی جانب سے کیے گئے "آپریشن بنیان المرصوص” کے جواب نے اسے شدید دباؤ میں ڈال دیا ہے۔
دوسری جانب وائٹ ہاؤس کی پریس سیکرٹری کیرولین لیویٹ نے کہا ہے کہ امریکہ، پاک بھارت کشیدگی میں کمی لانے کے لیے فعال کردار ادا کر رہا ہے۔
نیوز بریفنگ کے دوران کیرولین لیویٹ نے بتایا کہ امریکی وزیر خارجہ مارکو روبیو، پاکستان اور بھارت کے اعلیٰ قیادت سے رابطے میں ہیں اور دونوں فریقین پر زور دیا جا رہا ہے کہ وہ حالات کو مزید نہ بگاڑیں۔
انہوں نے یہ بھی کہا کہ امریکی صدر ڈونلڈ ٹرمپ اس معاملے پر پہلے ہی بات چیت کر چکے ہیں، اور اُن کے دونوں ممالک کے سربراہان سے خوشگوار تعلقات ہیں۔
