واشنگٹن، امریکی صدر ڈونلڈ ٹرمپ نے کہا کہ امریکا نے پاکستان اور بھارت پر دباؤ ڈال کر دونوں ملکوں کے درمیان جوہری تصادم کو روکا ہے۔
وائٹ ہاؤس میں پریس کانفرنس کے دوران انہوں نے کہا کہ امریکی انتظامیہ کی مدد سے پاک بھارت جنگ بندی معاہدہ ممکن ہوا، بھارت اور پاکستان کے قائدین غیر متزلزل تھے، میں نے انہیں کہا کہ اگر جنگ سے باز نہ آئے تو کوئی تجارتی معاہدہ نہیں ہوگا۔
امریکی صدر نے کہا کہ دونوں ممالک نے جنگ تجارت کی وجہ سے بند کی ہے، امریکا تجارت کے حوالے سے بھارت اور پاکستان کی مدد کیلئے تیار ہے، بھارت کے ساتھ تجارتی معاہدے پر بات چیت کر رہے ہیں پاکستان کے ساتھ بھی کریں گے۔
دوسری جانب پاکستانی فضائی حدود کی معطلی کو آج انیسواں روز ہو چکا ہے جس کے نتیجے میں بھارتی فضائی کمپنیوں کو شدید مشکلات کا سامنا ہے، گزشتہ اٹھارہ دنوں میں کم از کم 2ہزار بھارتی پروازیں متاثر ہو چکی ہیں، جن میں تاخیر، منسوخی یا متبادل راستے شامل ہیں۔
ذرائع کا بتانا ہے کہ بھارتی ائیر لائنز کو اب تک ایندھن، فضائی فاصلہ بڑھنے اور دیگر لاجسٹک اخراجات کی وجہ سے 400 کروڑ بھارتی روپے سے زیادہ کا نقصان ہو چکا ہے، لمبے فضائی روٹس نے آپریٹنگ لاگت میں نمایاں اضافہ کر دیا ہے۔
