متحدہ عرب امارات نے نئے سال کے موقع پر اپنے شہریوں کے لیے ایک خوش آئند فیصلہ کرتے ہوئے نجی شعبے میں کام کرنے والے اماراتی ملازمین کی تنخواہوں میں بڑا اضافہ کرنے کا اعلان کر دیا ہے۔ اس اقدام کو حکومت کی جانب سے مقامی افرادی قوت کے معاشی تحفظ اور نجی شعبے میں اماراتی شہریوں کی حوصلہ افزائی کی ایک اہم کوشش قرار دیا جا رہا ہے۔
یو اے ای حکومت کے مطابق یکم جنوری 2026 سے نجی شعبے میں کام کرنے والے اماراتی شہریوں کے لیے کم از کم ماہانہ تنخواہ 6 ہزار درہم مقرر کر دی گئی ہے۔ اس سے قبل یہ حد 5 ہزار درہم تھی، جس میں اب ایک ہزار درہم کا اضافہ کیا گیا ہے۔ حکام کا کہنا ہے کہ اس فیصلے کا مقصد اماراتی شہریوں کے معیارِ زندگی کو بہتر بنانا اور نجی شعبے کو مزید پرکشش بنانا ہے۔
متحدہ عرب امارات کی وزارت انسانی وسائل اور اماراتائزیشن نے وضاحت کی ہے کہ یہ نیا قانون تمام اقسام کے ورک پرمٹس پر لاگو ہوگا۔ اس میں نئے ورک پرمٹ کا اجرا، موجودہ اجازت ناموں کی تجدید اور کسی بھی قسم کی ترمیم شامل ہے۔ یعنی یکم جنوری 2026 کے بعد کوئی بھی ایسا ورک پرمٹ منظور نہیں کیا جائے گا جو مقررہ کم از کم تنخواہ کے معیار پر پورا نہ اترتا ہو۔
وزارت نے یہ بھی بتایا ہے کہ آجرین کو اس تنخواہ میں اضافے سے متعلق پیشگی آگاہی فراہم کی جائے گی۔ اس مقصد کے لیے اسمارٹ ایپلیکیشنز اور دیگر سرکاری سروس چینلز کے ذریعے خودکار پیغامات بھیجے جائیں گے تاکہ نجی ادارے بروقت اپنی ذمہ داریاں پوری کر سکیں۔
وزارت انسانی وسائل نے خبردار کیا ہے کہ اگر کسی ادارے نے مقررہ تاریخ تک اماراتی ملازمین کی تنخواہ 6 ہزار درہم تک نہ بڑھائی تو یکم جنوری 2026 کے بعد ایسے ملازمین کے لیے کسی بھی قسم کا نیا، تجدید شدہ یا ترمیم شدہ ورک پرمٹ جاری یا پروسیس نہیں کیا جائے گا۔
اس کے علاوہ حکام نے یہ بھی واضح کیا ہے کہ اگر تنخواہوں میں اضافہ 30 جون 2026 تک بھی نافذ نہ کیا گیا تو یکم جولائی 2026 سے متعلقہ اداروں کے خلاف تادیبی کارروائی عمل میں لائی جائے گی، جس میں جرمانے اور دیگر انتظامی اقدامات شامل ہو سکتے ہیں۔
یاد رہے کہ اس سے قبل نافذ قواعد کے تحت نجی شعبے میں اماراتی شہریوں کے لیے کم از کم قانونی تنخواہ 5 ہزار درہم مقرر تھی۔ نئے فیصلے کو اماراتی افرادی قوت کے لیے سالِ نو کا ایک بڑا تحفہ قرار دیا جا رہا ہے، جس سے ہزاروں ملازمین کو براہِ راست فائدہ پہنچنے کی توقع ہے۔
