امریکی صدر Donald Trump نے خبردار کیا ہے کہ اگر ایران کے ساتھ کوئی مؤثر معاہدہ طے نہ پایا تو اس کے خلاف پہلے سے کہیں زیادہ شدید اور تباہ کن بمباری کی جا سکتی ہے۔ ان کا کہنا تھا کہ امریکہ ہر ممکن آپشن کو زیر غور رکھے ہوئے ہے۔
سوشل میڈیا پر جاری اپنے بیان میں ٹرمپ نے کہا کہ امریکی جنگی جہاز، فوجی اہلکار اور اسلحہ ایران کے اطراف ہی تعینات رہیں گے تاکہ کسی بھی ہنگامی صورتحال میں فوری کارروائی کی جا سکے۔ انہوں نے واضح کیا کہ حتمی اور قابل عمل معاہدہ ہونے تک یہی پوزیشن برقرار رکھی جائے گی۔
انہوں نے مزید کہا کہ اگر مذاکرات ناکام ہوئے تو ممکنہ حملے ماضی کے مقابلے میں کہیں زیادہ خطرناک اور وسیع ہوں گے۔ ٹرمپ نے اس بات کا اعادہ کیا کہ ایران کو جوہری ہتھیار حاصل کرنے کی اجازت نہیں دی جائے گی اور آبنائے ہرمز کو کھلا رکھنا ضروری ہوگا۔
دوسری جانب امریکی نائب صدر JD Vance نے کہا کہ امریکہ نے پاکستان کے ذریعے ایران کے ساتھ سفارتی رابطے قائم کیے ہیں اور توقع ہے کہ مذاکرات اسی ہفتے شروع ہو جائیں گے۔ ان کے مطابق ایران نے آبنائے ہرمز کھولنے پر آمادگی ظاہر کی ہے۔
ٹرمپ کا بیان: پاکستانی قیادت سے مشاورت کے بعد ایران سے جنگ بندی پر آمادگی
جے ڈی وینس کا کہنا تھا کہ ایران کو سنجیدگی کے ساتھ مذاکرات کی میز پر آنا ہوگا کیونکہ وہ کسی صورت جوہری ہتھیار نہیں رکھ سکتا۔ انہوں نے کہا کہ امریکہ ایران پر عائد پابندیوں میں نرمی پر بات چیت کے لیے تیار ہے، تاہم اس کے لیے ایران کو مثبت پیش رفت دکھانا ہوگی۔
انہوں نے مزید کہا کہ جنگ بندی کے بعد اگلا قدم ایران کو اٹھانا ہے اور اگر صورتحال خراب ہوئی تو صدر ٹرمپ کے پاس دوبارہ جنگ کی طرف جانے کے تمام آپشنز موجود ہیں۔
