واشنگٹن: سابق امریکی صدر ڈونلڈ ٹرمپ نے یورپی یونین پر یکم جون 2025 سے 50 فیصد تجارتی ٹیرف عائد کرنے کی سفارش کر دی ہے۔
اپنے سوشل میڈیا پلیٹ فارم ’ٹروتھ سوشل‘ پر جاری بیان میں ٹرمپ نے کہا کہ یورپی یونین کے ساتھ معاملات کرنا انتہائی مشکل ثابت ہوا ہے۔
انہوں نے الزام عائد کیا کہ یورپی یونین کی تجارتی رکاوٹیں، ویٹ ٹیکس، کارپوریٹ جرمانے، غیر مالیاتی پابندیاں اور امریکی کمپنیوں کے خلاف غیر منصفانہ و بلاجواز قانونی کارروائیاں ایسے عوامل ہیں جن کی وجہ سے امریکہ کو سالانہ 25 ارب ڈالر سے زائد کا تجارتی خسارہ برداشت کرنا پڑ رہا ہے، جو کہ ان کے بقول ناقابلِ قبول ہے۔
ٹرمپ نے کہا کہ یورپی یونین کے ساتھ مذاکرات کسی نتیجے پر نہیں پہنچ پا رہے، جس کی وجہ سے وہ یکم جون 2025 سے یورپی مصنوعات پر 50 فیصد ٹیرف عائد کرنے کی سفارش کر رہے ہیں۔
ان کا مزید کہنا تھا کہ "اگر کوئی چیز امریکہ میں تیار یا بنائی گئی ہوگی تو اس پر کوئی ٹیرف عائد نہیں ہوگا۔”
واضح رہے کہ اس سے قبل اپریل میں بھی ٹرمپ نے یورپی یونین پر 20 فیصد جوابی ٹیرف عائد کیا تھا، جسے بعد ازاں منسوخ کر دیا گیا تھا۔
