امریکی صدر ڈونلڈ ٹرمپ نے اعلان کیا ہے کہ مزید 20 ممالک کے شہریوں پر امریکی سرحدی سفر پر پابندیاں عائد کر دی گئی ہیں، اور نئی پالیسی یکم جنوری سے نافذ العمل ہوگی۔ اس اقدام کے تحت پابندی ان ممالک کے طلبہ، امریکی شہریوں کے اہل خانہ اور افغان اسپیشل امیگرینٹ ویزا کے حامل افراد پر بھی لاگو ہوگی۔
امریکی میڈیا کے مطابق پابندیوں کی زد میں آنے والے ممالک میں شام، جنوبی سوڈان، نائجر، مالی اور برکینا فاسو شامل ہیں۔ اس کے علاوہ ایسے شہری بھی پابندیوں کا شکار ہوں گے جن کی سفری دستاویزات فلسطینی اتھارٹی جاری کرتی ہے۔
صدر ٹرمپ نے کہا ہے کہ جزوی پابندیاں ان ممالک کے شہریوں پر بھی لگائی گئی ہیں جن میں انگولا، انٹیگوا و باربوڈا، بنین، آئیوری کوسٹ، ڈومینیکا، گبون، گیمبیا، ملاوی، موریطانیہ، نائجیر، سینیگال، تنزانیہ، ٹونگا، زیمبیا اور زمبابوے شامل ہیں۔
واضح رہے کہ صدر ٹرمپ نے اس سے قبل جون میں افغانستان سمیت 12 ممالک کے شہریوں پر پابندیاں عائد کی تھیں۔ اس کے بعد وائٹ ہاؤس کے باہر افغان شہری کی نیشنل گارڈ پر فائرنگ کے واقعے کے بعد انہوں نے اعلان کیا کہ تیسری دنیا کے تمام ممالک سے افراد کی نقل و حرکت کو محدود کیا جائے گا۔
امریکا میں اسرائیل کی حمایت کم ہو گئی، کانگریس میں یہود مخالفت بڑھ رہی ہے: ڈونلڈ ٹرمپ
ٹرمپ انتظامیہ کے اس تازہ اقدام کے بعد مجموعی طور پر پابندیوں کا شکار ممالک کی تعداد 35 تک پہنچ گئی ہے۔ ساتھ ہی انتظامیہ نے مزید 15 افریقی ممالک کے شہریوں پر پابندی عائد کرنے کا اعلان کیا ہے۔
وائٹ ہاؤس کے ترجمان کے مطابق امریکا کا مقصد ایسے غیر ملکیوں کو داخلے سے روکنا ہے جو ملک کی سلامتی اور استحکام کے لیے خطرہ بن سکتے ہیں۔ امریکی حکومت کا کہنا ہے کہ پابندیاں قومی سلامتی کے مفاد میں اور غیر محفوظ عناصر کی نقل و حرکت محدود کرنے کے لیے ضروری ہیں۔
