امریکی صدرڈونلڈ ٹرمپ نے دعویٰ کیا ہے کہ آبنائے ہرمز میں بارودی سرنگیں بچھانے والی 10 کشتیوں اور جہازوں کو تباہ کر دیا گیا ہے۔
اپنے بیان میں ڈونلڈ ٹرمپ نے کہا کہ ایران کی جانب سے آبنائے ہرمز میں مائنز بچھانے کی کوشش کی گئی تھی جس پر امریکی افواج نے کارروائی کی۔ انہوں نے خبردار کیا کہ اگر ایران نے اس نوعیت کی سرگرمیاں جاری رکھیں تو امریکا مزید سخت اقدامات کرے گا۔
دوسری جانب امریکی فوج کی مرکزی کمان سینٹ کام نے دعویٰ کیا ہے کہ امریکی فورسز نے آبنائے ہرمز کے قریب بارودی سرنگیں بچھانے میں ملوث 16 ایرانی کشتیوں کو تباہ کر دیا ہے۔
آبنائے ہرمز میں رکاوٹ کے خدشے پر آرامکو اور ٹرمپ کی وارننگ
اس سے قبل بھی ڈونلڈ ٹرمپ نے اپنے بیان میں کہا تھا کہ اگر آبنائے ہرمز میں بارودی سرنگیں بچھائی گئی ہیں تو انہیں فوری طور پر ہٹا دیا جائے۔ ان کا کہنا تھا کہ اگر سرنگیں نہ ہٹائی گئیں تو ایران کو ایسے نتائج کا سامنا کرنا پڑ سکتا ہے جو اس سے پہلے کبھی نہیں دیکھے گئے۔
امریکی صدر نے مزید کہا کہ اگر ایران بچھائی گئی بارودی سرنگیں ہٹا دیتا ہے تو یہ کشیدگی کم کرنے اور درست سمت میں ایک اہم قدم ہوگا۔
