امریکی میڈیا رپورٹس کے مطابق ٹرمپ انتظامیہ نے دنیا بھر میں امریکی سفارتخانوں کو غیر ملکی طلبہ کو اسٹوڈنٹ ویزے جاری کرنے سے روک دیا ہے۔ اس فیصلے کے تحت نئے ویزا انٹرویوز فی الحال معطل کر دیے گئے ہیں۔
ذرائع کے مطابق امریکی حکام اب سٹوڈنٹ ویزا درخواست دہندگان کی سوشل میڈیا پروفائلز کی مزید سخت جانچ پڑتال کریں گے۔ حکومتی مؤقف کے مطابق یہ اقدام امیگریشن کنٹرول کو مزید سخت کرنے اور قومی سلامتی کو ترجیح دینے کی پالیسی کا حصہ ہے۔
یاد رہے کہ اس سے قبل بھی بعض ممالک کے طلبہ پر امریکی تعلیمی اداروں میں داخلے پر پابندیاں عائد کی جا چکی ہیں۔
تعلیمی حلقوں میں تشویش
تعلیمی ماہرین نے اس پالیسی پر تشویش کا اظہار کرتے ہوئے کہا ہے کہ اس سے امریکہ کی بین الاقوامی تعلیمی ساکھ کو نقصان پہنچ سکتا ہے اور دنیا بھر سے ہنر مند طلبہ کی آمد میں رکاوٹ پیدا ہو گی۔
تاحال یہ واضح نہیں کہ یہ پابندی کب تک برقرار رہے گی، اور آیا مستقبل میں اس فیصلے میں نرمی کی گنجائش موجود ہے یا نہیں۔
