میلبرن: آسٹریلیا کے میلبرن انٹرنیشنل ایئرپورٹ پر ایک خوفناک واقعہ پیش آیا جب ایک مسافر کی جیب میں رکھا لیتھیئم پاور بینک اچانک پھٹ گیا اور آگ بھڑک اٹھی، جس سے مسافر جھلس گیا۔
غیر ملکی میڈیا کے مطابق یہ واقعہ قانتس ایئرلائن کے بزنس لاؤنج میں پیش آیا، جہاں پاور بینک حرارت کی وجہ سے اچانک آگ پکڑ گیا۔ دھواں پھیلنے کے بعد لاؤنج میں موجود تقریباً 150 افراد کو فوری طور پر باحفاظت باہر نکال لیا گیا۔
عینی شاہدین کے مطابق عملے نے متاثرہ مسافر کو فوراً شاور روم میں لے جا کر آگ بجھائی، اور بعد ازاں طبی عملے نے ابتدائی امداد فراہم کی۔ زخمی شخص کو اسپتال منتقل کیا گیا جہاں اس کی حالت خطرے سے باہر بتائی گئی ہے۔
قانتس ایئرلائن نے واقعے کے بعد اعلان کیا کہ وہ پاور بینک اور لیتھیئم بیٹریز کے استعمال سے متعلق اپنی پالیسی کا ازسرِنو جائزہ لے رہی ہے اور جلد نئی ہدایات جاری کرے گی۔
واضح رہے کہ متعدد بین الاقوامی ایئرلائنز پہلے ہی پاور بینک کے استعمال پر پابندی عائد کر چکی ہیں، جبکہ کچھ نے پاور بینک کی گنجائش اور چارجنگ کے حوالے سے حدود مقرر کر رکھی ہیں۔
