ریاض: سعودی عرب میں 95ویں قومی دن کے موقع پر 23 ستمبر کو ملک بھر میں عام تعطیل کا اعلان کر دیا گیا ہے۔
عرب میڈیا کے مطابق قومی دن 1932 کے اُس تاریخی فرمان کی یاد میں منایا جاتا ہے جس کے تحت بانیِ مملکت شاہ عبدالعزیز نے نجد اور حجاز کو یکجا کر کے "سعودی عرب” کے نام سے ایک ریاست قائم کی تھی۔
پہلی بار یہ دن 1965 میں شاہ فیصل کے دور میں منایا گیا، جبکہ 2005 میں شاہ عبداللہ نے شاہی فرمان کے ذریعے اسے مستقل سرکاری تعطیل قرار دیا۔
اس سال قومی دن کا تھیم "ہمارا فخر ہماری فطرت میں ہے” رکھا گیا ہے، جو سعودی عوام کی ثقافتی روایات اور قدرتی ورثے کو اجاگر کرتا ہے۔ جنرل انٹرٹینمنٹ اتھارٹی کے مطابق یہ تھیم مہمان نوازی، جرات، وقار، سخاوت اور بلند حوصلے جیسے اوصاف کی عکاسی کرتا ہے۔
یومِ قومی کے موقع پر ملک بھر میں آتشبازی، ڈرون شوز، سعودی ہاکس کے فضائی مظاہرے، ثقافتی میلوں، روایتی رقص اور مختلف نمائشوں کا انعقاد کیا جائے گا۔
ریاض، جدہ اور دمام سمیت بڑے شہروں میں خصوصی تقریبات ہوں گی، جبکہ اہم عمارتوں کو سبز روشنیوں سے سجایا جائے گا۔ ہر سال کی طرح اس بار بھی سعودی شہری اور غیر ملکی باشندے سبز پرچم لہرا کر اور قومی رنگوں میں ملبوس ہو کر ملی جوش و جذبے کا مظاہرہ کریں گے۔
