امریکی صدر ڈونلڈ ٹرمپ نے کہا ہے کہ روسی صدر ولادیمیر پیوٹن یوکرین کی جانب سے روسی فضائی اڈوں پر حالیہ حملوں کا سخت جواب دینے کا ارادہ رکھتے ہیں۔ دونوں رہنماؤں کے درمیان ایک گھنٹے طویل گفتگو میں ایران اور پاک-بھارت تنازع پر بھی بات ہوئی۔
واشنگٹن اور ماسکو کے درمیان رابطوں کے دوران یوکرین جنگ نے ایک بار پھر عالمی توجہ حاصل کر لی ہے۔ صدر ٹرمپ نے انکشاف کیا کہ روسی صدر پیوٹن نے یوکرین کے حالیہ ڈرون حملوں پر سخت کارروائی کا عندیہ دیا ہے۔ دونوں رہنماؤں کے درمیان بدھ کے روز ایک گھنٹے سے زائد طویل ٹیلیفونک گفتگو ہوئی، جس میں نہ صرف یوکرین جنگ بلکہ ایران کے جوہری معاہدے اور پاکستان و بھارت کے درمیان جاری تناؤ پر بھی تبادلہ خیال کیا گیا۔
صدر ٹرمپ نے گفتگو کے بعد اپنے سوشل میڈیا پیغام میں کہا کہ صدر پیوٹن نے واضح طور پر کہا ہے کہ یوکرین کی طرف سے روسی فضائی اڈوں پر کیے گئے حالیہ حملے کا مناسب اور سخت جواب دیا جائے گا۔
تاہم، ٹرمپ نے اس بات پر بھی زور دیا کہ یہ بات چیت کسی فوری امن معاہدے کی ضمانت نہیں دیتی، البتہ رابطے برقرار رکھنا اہم ہے۔
اس بات چیت کے دوران پیوٹن نے ایران کے ساتھ جوہری مذاکرات میں معاونت کی پیشکش بھی کی۔ صدر ٹرمپ نے امید ظاہر کی کہ روس کی شمولیت خطے میں استحکام کے لیے سودمند ثابت ہو سکتی ہے۔
یاد رہے کہ حالیہ دنوں یوکرینی ڈرونز نے روسی سرحد کے اندر گہرائی تک کارروائیاں کی ہیں، جن میں اہم روسی طیارے تباہ کیے گئے۔ ماہرین نے ان حملوں کو روس کے لیے "پرل ہاربر” جیسے دھچکے سے تشبیہ دی ہے۔
یوکرینی انٹیلی جنس کا دعویٰ ہے کہ ان حملوں کے نتیجے میں روس کو تقریباً 7 ارب ڈالر کا نقصان ہوا ہے، اور اس کے کروز میزائلوں کے ذخیرے کا ایک تہائی حصہ بھی تباہ ہو چکا ہے۔ یوکرین کی داخلی سکیورٹی ایجنسی نے دعویٰ کیا کہ یکم جون کے ایک بڑے حملے میں 40 سے زائد روسی لڑاکا طیاروں کو نشانہ بنایا گیا۔
یاد رہے کہ یوکرین اور روس کے درمیان جاری جنگ میں ڈرون حملے ایک نئی سطح پر پہنچ چکے ہیں، جہاں دونوں فریق جدید ٹیکنالوجی کا استعمال کرتے ہوئے ایک دوسرے کو شدید نقصان پہنچا رہے ہیں۔ یہ کشیدگی نہ صرف خطے بلکہ عالمی سیاست میں بھی بڑی تبدیلیوں کا سبب بن رہی ہے۔
