روس نے پاکستان اور افغانستان کے درمیان قطر اور ترکیہ کی ثالثی میں طے پانے والے جنگ بندی معاہدے کا خیرمقدم کیا ہے۔
ترک خبر رساں ادارے ’انادولو‘ کے مطابق، روسی وزارتِ خارجہ کی ترجمان ماریا زاخارووا نے کہا کہ پاک-افغان سرحد پر یہ معاہدہ دوحہ اور انقرہ کے حکام کی ثالثی سے طے پایا اور اس کا خیرمقدم کیا جاتا ہے۔
زاخارووا نے کہا کہ اسلام آباد اور کابل کا بات چیت کے ذریعے اختلافات حل کرنے کا عزم دونوں ممالک کے درمیان امن قائم رکھنے کی بنیاد فراہم کرتا ہے اور علاقائی سلامتی کو یقینی بنانے میں مددگار ہے۔
انہوں نے مزید اپیل کی کہ دونوں ممالک خصوصاً دہشت گردی کے خلاف مشترکہ کوششوں میں تعاون کو فروغ دیں۔
یاد رہے کہ اتوار کو دوحہ میں ہونے والے مذاکرات کے دوران پاکستان اور افغانستان نے فوری جنگ بندی پر اتفاق کیا، جو کئی روز سے جاری سرحدی کشیدگی کے خاتمے کے بعد سامنے آئی۔
چین کا پاک افغان جنگ بندی کا خیر مقدم، یو این مشن افغانستان کا لڑائی ختم کرنے کا مطالبہ
دونوں ممالک کے درمیان مذاکرات کا اگلا دور 25 اکتوبر کو ترکیہ کے شہر استنبول میں منعقد ہوگا۔
گذشتہ روز چین اور سعودی عرب نے بھی پاکستان اور افغانستان کے درمیان جنگ بندی معاہدے کا خیرمقدم کیا تھا۔
