ماسکو: روسی وزیرِ خارجہ سرگئی لاوروف نے تصدیق کی ہے کہ صدر ولادیمیر پیوٹن نے ممکنہ جوہری تجربے کی تیاری کے لیے ہدایت جاری کر دی ہے۔
روسی خبر رساں ایجنسی ’تاس‘ (TASS) کے مطابق، لاوروف نے کہا کہ “5 نومبر کو سلامتی کونسل کے اجلاس کے دوران صدر پیوٹن کی ہدایت پر عمل جاری ہے اور نتائج سے عوام کو آگاہ کیا جائے گا۔”
یہ حکم اس وقت سامنے آیا جب امریکی صدر ڈونلڈ ٹرمپ نے امریکہ کی جانب سے جوہری تجربات دوبارہ شروع کرنے کا اعلان کیا تھا۔ لاوروف نے مزید کہا کہ روس کو ٹرمپ کی جانب سے اس فیصلے کی کوئی وضاحت موصول نہیں ہوئی۔
واضح رہے کہ حالیہ ہفتوں میں روس اور امریکہ کے تعلقات میں شدید کشیدگی دیکھنے میں آئی ہے۔ ٹرمپ نے یوکرین جنگ کے حوالے سے پیوٹن سے طے شدہ سربراہی اجلاس منسوخ کیا اور روس پر نئی پابندیاں عائد کی ہیں۔
امریکی صدر ٹرمپ نے 31 اکتوبر کو اعلان کیا تھا کہ امریکہ 33 سال بعد جوہری تجربات دوبارہ شروع کرے گا، تاہم یہ واضح نہیں کیا کہ یہ تجربات زیرِ زمین ہوں گے یا کسی اور شکل میں۔ ٹرمپ نے کہا کہ یہ اقدام چین اور روس جیسے حریف ممالک کے لیے سخت پیغام ہے۔
