امریکہ کے شہر بینگر، مائن میں اتوار کی شام ایک نجی جیٹ طیارہ ٹیک آف کے دوران حادثے کا شکار ہو گیا۔ طیارے میں کل آٹھ افراد سوار تھے جن میں عملے کے تین ارکان اور ممکنہ طور پر پانچ مسافر شامل تھے۔
حادثے کا شکار طیارہ بزنس جیٹ تھا۔ بینگر انٹرنیشنل ایئرپورٹ انتظامیہ کے مطابق شام تقریباً 7 بج کر 45 منٹ پر ایمرجنسی ٹیموں نے جائے حادثہ پر فوری کارروائی شروع کی۔ امدادی سرگرمیاں کئی گھنٹوں تک جاری رہیں، اور واقعے کے بعد ایئرپورٹ کو رات بھر کے لیے بند کر دیا گیا جبکہ ایک ایمرجنسی آپریشن سینٹر قائم کر دیا گیا۔
حادثے میں زخمی ہونے والے افراد کی حالت کے بارے میں فوری تفصیلات سامنے نہیں آ سکیں۔ FAA کے مطابق حادثے کی تحقیقات نیشنل ٹرانسپورٹیشن سیفٹی بورڈ کے ساتھ مل کر کی جائیں گی۔
یہ حادثہ ایسے وقت پیش آیا جب امریکہ کے شمال مشرقی علاقوں میں شدید برفانی طوفان جاری تھا۔ مائن میں درجہ حرارت نقطہ انجماد سے نیچے ہے اور ہلکی برف باری کے باعث حدِ نگاہ انتہائی کم ہو گئی تھی۔ ریڈیو آڈیو کے مطابق، حادثے سے کچھ دیر قبل ایئر ٹریفک کنٹرولرز اور پائلٹس کم حدِ نگاہ اور ڈی آئسنگ کے مسائل پر بات کر رہے تھے۔
ٹیک آف کی اجازت ملنے کے تقریباً دو منٹ بعد ایئر فیلڈ پر تمام پروازوں کو روکنے کا اعلان کیا گیا، تاہم طیارہ تب تک حادثے کا شکار ہو چکا تھا۔ مزید معلومات اور زخمیوں کی حالت بعد میں فراہم کی جائیں گی۔
