چینی وزیرِ خارجہ وانگ ای نے پاکستانی فوج کے سربراہ فیلڈ مارشل سید عاصم منیر سے ملاقات کی، جس کے بعد چین کی وزارت خارجہ نے اہم بیان جاری کیا۔
چینی وزارت خارجہ کے مطابق وانگ ای نے کہا کہ پاکستانی فوج قومی استحکام کا ستون اور پاک چین دوستی و تعاون کی مضبوط محافظ ہے۔ انہوں نے کہا کہ پاکستانی فوج نے ہمیشہ دونوں ممالک کی قیادت کے درمیان طے پانے والے اہم معاہدات پر عمل درآمد کی بھرپور حمایت کی ہے۔
وانگ ای نے مزید کہا کہ دنیا میں پیدا ہونے والے غیر یقینی حالات میں مضبوط پاک چین تعلقات کو فروغ دینا علاقائی امن و استحکام کے لیے نہایت سودمند ہے، اور چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔
انہوں نے کہا کہ وقت کے کڑے امتحانات کے باوجود پاک چین تعلقات مزید مضبوط ہوئے ہیں اور دونوں ممالک ایک مضبوط روایتی دوستی قائم کر چکے ہیں۔ چینی وزیر خارجہ نے یقین دلایا کہ چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا اور عالمی امور میں پاکستان کے بڑے کردار کا خیرمقدم کرتا ہے۔
چینی وزارتِ خارجہ نے یہ بھی بتایا کہ فیلڈ مارشل سید عاصم منیر نے کہا کہ چین پاکستان کا ’آہنی دوست‘ ہے اور دونوں ممالک ہمیشہ ایک دوسرے کے دکھ سکھ میں شریک رہے ہیں۔ انہوں نے کہا کہ پاک چین اسٹریٹجک شراکت داری چٹان کی طرح مضبوط ہے اور چین کے ساتھ دوستانہ تعلقات قائم رکھنا پورے پاکستانی قوم کا متفقہ موقف ہے۔
فیلڈ مارشل سید عاصم منیر نے کہا کہ پاکستان کی معاشی اور سماجی ترقی میں قیمتی تعاون پر چین کی قیادت کا شکریہ ادا کرتے ہیں۔
انہوں نے مزید کہا کہ پاکستانی فوج انسداد دہشت گردی اور سکیورٹی تعاون کو فعال طور پر فروغ دینے کے لیے تیار ہے اور پاکستان میں چینی اہلکاروں، منصوبوں اور اداروں کی حفاظت یقینی بنانے کی کوشش جاری رہے گی۔ انہوں نے کہا کہ پاک چین دوستی کو مزید مستحکم بنانے کے لیے اقدامات اور ترقی کی راہ پر سفر جاری رکھا جائے گا۔
