کینیا میں چھوٹا طیارہ گر کر تباہ، 12 افراد سوار، ہلاکتوں کا خدشہ

کینیا کے جنوبی علاقے کوالے کاؤنٹی میں ایک چھوٹا طیارہ ٹیک آف کے چند منٹ بعد گر کر تباہ ہو گیا، جس کے نتیجے میں تمام 12 افراد کے ہلاک ہونے کا خدشہ ظاہر کیا جا رہا ہے۔

کینیا سول ایوی ایشن اتھارٹی کے مطابق طیارے میں سوار تمام مسافر غیر ملکی سیاح تھے۔ کوالے کاؤنٹی کے کمشنر نے بتایا کہ ابھی یہ تعین کیا جا رہا ہے کہ ان مسافروں کا تعلق کن ممالک سے تھا۔

حکام کے مطابق حادثے کے فوراً بعد طیارے میں آگ بھڑک اٹھی، اور جائے وقوعہ پر ہر طرف ملبہ بکھر گیا۔ ریسکیو ٹیموں نے موقع پر پہنچ کر امدادی کارروائیاں شروع کر دی ہیں، تاہم ابتدائی اطلاعات کے مطابق کسی کے زندہ بچنے کے امکانات نہ ہونے کے برابر ہیں۔

تحقیقات کے لیے ایک خصوصی ٹیم تشکیل دے دی گئی ہے جو حادثے کی وجوہات کا تعین کرے گی۔