دنیا کے امیر ترین افراد میں شمار ہونے والے ایمازون کے بانی جیف بیزوس اور معروف صحافی لورین سانچز کی پرتعیش شادی نے جہاں عالمی میڈیا، شوبز اور فیشن حلقوں کی بھرپور توجہ حاصل کی، وہیں اطالوی شہر وینس میں شدید عوامی غصے، احتجاج اور سماجی مباحثے کو بھی جنم دیا۔ یہ شادی 27 جون 2025 کو وینس کے تاریخی جزیرے سان جیورجیو میجیور میں منعقد ہوئی، جس پر تقریباً 50 ملین ڈالر خرچ کیے جانے کی اطلاعات ہیں۔
اس تقریب میں اوپرا ونفرے، لیونارڈو ڈی کیپریو، کرس جینر، ٹام بریڈی اور کم کارڈیشین جیسی مشہور شخصیات شریک ہوئیں۔ تقریب مکمل طور پر نجی تھی، عوامی راستے بند کیے گئے اور شہر کا مرکزی حصہ سیل کر دیا گیا، جس پر مقامی شہری سراپا احتجاج بن گئے۔ "No Space for Bezos” جیسے بینرز کے ساتھ مظاہرین نے وینس کے تاریخی اسکوائر میں بیزوس اور اُن کی تقریب کو تنقید کا نشانہ بنایا۔ ان کا کہنا تھا کہ شہر پہلے ہی ماحولیاتی اور رہائشی مسائل کا شکار ہے، ایسے میں ایک ارب پتی کی نمائش نے عوام کے زخموں پر نمک چھڑکا۔
شادی میں لورین سانچز نے ڈولچی اینڈ گبانا کا جالی دار اور کارسیٹ اسٹائل عروسی لباس زیب تن کیا، جو صوفیہ لورین کی 1958 کی فلم "Houseboat” سے متاثر تھا۔ سانچز کا کہنا تھا کہ یہ لباس اُن کی ذاتی تبدیلی اور سفر کی عکاسی کرتا ہے، لیکن ہر کسی نے اسے پسند نہیں کیا۔ معروف امریکی صحافی کیٹی کورک نے اسے "1980ء کی دہائی کی واپسی” کہا اور سوشل میڈیا پر طنزاً تبصرہ کیا کہ "بھڑک پن واپس آ گیا ہے۔”
شادی کے اگلے دن ایک ’پاجاما تھیم پارٹی‘ کا بھی انعقاد کیا گیا، جس میں مہمان ریشمی لباس، چپلوں اور روبز میں ملبوس تھے۔ ڈی جے کیسیڈی اور گلوکار اشر نے محفل کو گرمایا، اور رقص کا سلسلہ رات گئے تک جاری رہا۔ بیزوس اور سانچز نے اس موقع پر مقامی فلاحی اداروں کو عطیات دیے اور مہمانوں سے تحائف کی جگہ خیرات کرنے کی اپیل کی، مگر ناقدین کے مطابق صرف عطیہ دے دینا سماجی ذمے داری سے آنکھیں بند کرنے کے مترادف ہے۔
اداکارہ چارلیز تھیرون نے بھی اس شادی پر تنقید کی اور کہا، "دنیا جل رہی ہے اور وہ رقص کر رہے ہیں۔ ہمیں دعوت نہیں ملی، لیکن ہم ’کول‘ ہیں، وہ نہیں!” ان کا اشارہ عالمی بحرانوں، ماحولیاتی تباہی اور سماجی ناہمواریوں کی طرف تھا، جو اس تقریب کے تناظر میں مزید واضح ہو گئیں۔
یہ شادی بلاشبہ ایک رومانوی اور دلکش جشن تھی، لیکن اس نے یہ سوال بھی جنم دیے کہ کیا ارب پتی افراد اپنی دولت کے مظاہرے کے لیے عوامی وسائل استعمال کرنے کا حق رکھتے ہیں؟ کیا ایسی تقاریب سماجی ذمے داریوں سے بالاتر سمجھی جا سکتی ہیں؟ جیف بیزوس اور لورین سانچز کی یہ شادی بیک وقت محبت، طاقت، شہرت اور عدم مساوات کی نمائندہ تصویر بن کر رہ گئی ہے۔
