تل ابیب، اسرائیل نے صنعا ایئرپورٹ فوری خالی کرنے کی وارننگ جاری کردی ۔
اسرائیلی افواج نے یمن کے دارالحکومت صنعا میں واقع بین الاقوامی ہوائی اڈے کو فوری طور پر خالی کرنے کی سخت تنبیہ جاری کر دی ہے۔
سوشل میڈیا پلیٹ فارم” ایکس“ پر جاری بیان میں اسرائیلی فوج کے ترجمان نے صنعا کا نقشہ شیئر کیا، جس میں ایئرپورٹ کو نمایاں طور پر سرخ رنگ سے ظاہر کیا گیا ہے۔
ترجمان کے مطابق، نشاندہی شدہ علاقے میں موجود افراد کو فوری انخلا کی ہدایت کی گئی ہے تاکہ وہ ممکنہ خطرے سے بچ سکیں۔
اس بیان میں کہا گیا ہے کہ جو افراد صنعا ایئرپورٹ کے اندر یا آس پاس موجود ہیں، وہ خود کو غیر ضروری خطرے میں ڈال رہے ہیں اور انہیں فوری طور پر محفوظ مقامات کی جانب منتقل ہونا چاہیے۔
عرب ذرائع ابلاغ کے مطابق یہ وارننگ اسرائیلی فضائی کارروائی کے ایک دن بعد سامنے آئی ہے، جس میں کم از کم 21 افراد جاں بحق ہوئے۔
یہ حملے مبینہ طور پر اس کے ردعمل میں کیے گئے جن میں یمن کے حوثی گروپ نے اسرائیل کے بن گوریون ایئرپورٹ کو میزائل حملے کا نشانہ بنایا تھا۔
