پیپلز پارٹی بلوچستان کی قیادت میں تبدیلی، بلاول بھٹو کی منظوری سے سردار عمر گورگیج صدر، ربانی کاکڑ جنرل سیکریٹری اور ظہور بلیدی سیکریٹری اطلاعات مقرر
کوئٹہ میں پاکستان پیپلز پارٹی نے تنظیمی سطح پر اہم تبدیلیاں کرتے ہوئے پارٹی کی صوبائی قیادت میں نئی تقرریاں کر دی ہیں۔ چیئرمین پیپلز پارٹی بلاول بھٹو زرداری نے سینیٹر سردار عمر گورگیج کو پاکستان پیپلز پارٹی بلوچستان کا صدر مقرر کر دیا ہے، جس کا باقاعدہ نوٹیفکیشن جاری کر دیا گیا ہے۔
نئی قیادت کی منظوری پارٹی چیئرمین نے خود دی، جس کے مطابق ربانی کاکڑ کو پارٹی کا جنرل سیکریٹری اور ظہور بلیدی کو سیکریٹری اطلاعات مقرر کیا گیا ہے۔ یہ تقرریاں بلوچستان میں پیپلز پارٹی کی تنظیمی صلاحیت کو مزید فعال بنانے اور آنے والے سیاسی چیلنجز سے بہتر طور پر نمٹنے کے لیے کی گئی ہیں۔
پارٹی کے اندرونی ذرائع کا کہنا ہے کہ نئی قیادت کو تنظیمِ نو، کارکنوں کو متحرک کرنے اور بلوچستان میں پارٹی کی سیاسی ساکھ کو مضبوط بنانے کا ہدف دیا گیا ہے۔ ان تقرریوں کو پارٹی کی نئی حکمت عملی کا حصہ قرار دیا جا رہا ہے، جس کے تحت بلوچستان میں سیاسی اثر و رسوخ بڑھانے کے لیے فعال کردار ادا کیا جائے گا۔
یاد رہے کہ پیپلز پارٹی نے حالیہ انتخابات اور سیاسی تبدیلیوں کے بعد صوبائی سطح پر تنظیمی ڈھانچے کو ازسرنو ترتیب دینے کا فیصلہ کیا تھا تاکہ عوامی رابطہ مہم اور پارٹی کا پیغام صوبے بھر میں مؤثر انداز میں پہنچایا جا سکے۔
