اسرائیل کوئی سرحد نہیں مانتا، امریکا کے اشارے پر جہاں چاہتا ہے دراندازی کرتا ہے: ایرانی صدر

ایران کے صدر مسعود پزشکیان نے اسرائیل کی پالیسیوں کو شدید تنقید کا نشانہ بناتے ہوئے کہا ہے کہ اسرائیل کسی بین الاقوامی سرحد کو تسلیم نہیں کرتا اور امریکا کی پشت پناہی سے جہاں چاہے، مداخلت کر لیتا ہے۔

صدر پزشکیان نے کہا کہ ایران خطے میں جنگ کی توسیع نہیں چاہتا، لیکن اگر اس کی خودمختاری یا سلامتی کو چیلنج کیا گیا تو ردعمل انتہائی سخت اور فیصلہ کن ہوگا۔ ان کا کہنا تھا کہ "اسرائیل جتنا آگے بڑھے گا، ہمارا ردعمل اتنا ہی سخت ہوگا، اور ہم کسی بھی جارحیت کو برداشت نہیں کریں گے۔”

ایرانی صدر نے واضح کیا کہ ان کا ملک جوہری ہتھیار بنانے کا کوئی ارادہ نہیں رکھتا۔ انہوں نے کہا کہ ایران کا جوہری پروگرام پرامن مقاصد کے لیے ہے اور اس سے متعلق امریکا سے بات چیت جاری ہے۔ ان کا کہنا تھا کہ ایران توانائی کے حصول کے لیے یورینیم کی افزودگی کا عمل جاری رکھے گا کیونکہ یہ اس کا جائز حق ہے۔

انہوں نے زور دیا کہ "ایرانی قوم جارح نہیں، لیکن اگر چھیڑا گیا تو اپنے دفاع سے پیچھے نہیں ہٹے گی۔”