ایران اور اسرائیل کے درمیان جاری کشیدگی کے دوران ایران نے اسرائیل کے اہم ہوائی اڈے بن گوریون ایئرپورٹ کو میزائل حملوں کا نشانہ بنایا، جس کے نتیجے میں متعدد طیاروں کو نقصان پہنچا اور ایک میں آگ بھڑک اٹھی۔
عالمی میڈیا رپورٹس کے مطابق یہ میزائل صبح کے وقت داغے گئے۔ اسرائیلی حکام کا کہنا ہے کہ فضائی دفاعی نظام نے زیادہ تر میزائلوں کو فضا میں ہی تباہ کر دیا، تاہم ان کے ملبے نے ایئرپورٹ پر کھڑے طیاروں کو نشانہ بنایا۔
حکام نے تصدیق کی ہے کہ اس واقعے میں کم از کم تین طیاروں کو شدید نقصان پہنچا، جبکہ ایک طیارے میں آگ لگ گئی جسے بعد ازاں فائر بریگیڈ کی مدد سے بجھا لیا گیا۔ خوش قسمتی سے اس واقعے میں کوئی جانی نقصان رپورٹ نہیں ہوا۔
اسرائیل میں 200 سے زائد افراد زخمی، امریکی فوج کو بھی نقصان
دوسری جانب ایرانی حملوں کے باعث اسرائیل کے مختلف شہری علاقوں میں بھی تباہی دیکھی گئی، جہاں درجنوں گھروں اور گاڑیوں کو نقصان پہنچا ہے۔ ان حملوں نے شہری آبادی میں خوف و ہراس پھیلا دیا ہے۔
تجزیہ کاروں کے مطابق حالیہ حملوں میں شدت اس وقت آئی جب ایران کے گیس فیلڈ پر اسرائیلی کارروائی کے بعد صورتحال مزید بگڑ گئی۔ اس کے علاوہ ایرانی قیادت، خصوصاً مجتبیٰ خامنہ ای کی جانب سے علی لاریجانی کی ہلاکت کا بدلہ لینے کے اعلان نے بھی کشیدگی کو مزید بڑھا دیا ہے۔
