عالمی جوہری ادارے کا کہنا ہے کہ اب تک کسی ایرانی جوہری تنصیب کے نشانہ بننے یا نقصان کی باقاعدہ اطلاع موصول نہیں ہوئی۔
غیر ملکی خبر ایجنسی کے مطابق ادارے کا ہنگامی اجلاس آسٹریا کے دارالحکومت ویانا میں منعقد ہوا، جس میں ایران پر امریکی اور اسرائیلی حملوں کے بعد پیدا ہونے والی صورتحال کا جائزہ لیا گیا۔
اجلاس سے خطاب کرتے ہوئے آئی اے ای اے کے سربراہ رافیل گروسی نے کہا کہ تاحال کسی ایرانی جوہری تنصیب کو نقصان پہنچنے کی تصدیق نہیں ہوئی۔ انہوں نے بتایا کہ ایرانی نیوکلیئر اتھارٹی سے رابطے کی کوششیں جاری ہیں تاہم فی الحال کوئی باضابطہ جواب موصول نہیں ہوا۔
رافیل گراسی نے امید ظاہر کی کہ ایران کے ساتھ رابطے کا باضابطہ چینل جلد قائم ہو جائے گا اور فریقین سے اپیل کی کہ کسی بھی عسکری کارروائی میں انتہائی تحمل کا مظاہرہ کیا جائے۔
دوسری جانب عالمی جوہری ادارے میں ایرانی نمائندے نے دعویٰ کیا کہ ایران کی جوہری تنصیب کو نشانہ بنایا گیا ہے، تاہم اس دعوے کی آزادانہ تصدیق نہیں ہو سکی۔
