دبئی: دبئی پولیس نے عوامی تعلقات کو مضبوط بنانے کے جذبے کے تحت ایک کمسن بچی کی خواہش پوری کر کے مثال قائم کر دی۔
رپورٹس کے مطابق 3 سالہ سارہ نبیل نے پولیس افسر بننے اور لگژری پٹرولنگ گاڑی میں سیر کرنے کی خواہش ظاہر کی تھی، جسے دبئی پولیس نے فوراً حقیقت میں بدل دیا۔
یہ خواہش سارہ نے ایک مقامی اسپتال میں ہونے والے کمیونٹی ایونٹ کے دوران ظاہر کی تھی، جہاں اُس نے کہا کہ وہ “ننھی پولیس آفیسر” بننا چاہتی ہے۔
اسکول سکیورٹی انیشی ایٹو ٹیم نے فوری طور پر اس خواہش کو پورا کرنے کا فیصلہ کیا، جس سے دبئی پولیس کا بچوں میں خوشی اور معاشرتی اعتماد بڑھانے کا عزم نمایاں ہوا۔
سارہ اور اُس کے خاندان کا دبئی پولیس ہیڈکوارٹرز میں پرتپاک استقبال کیا گیا، جہاں کیپٹن ماجد بن سعد الکعبی (سربراہ اسکول سکیورٹی انیشی ایٹو ٹیم) اور لیفٹیننٹ مریم عیسیٰ (ڈپٹی ہیڈ) سمیت دیگر افسران موجود تھے۔
پولیس ٹیم نے سارہ کو تحفے اور دبئی پولیس کی ننھی سائز کی وردی پیش کی۔ بعد ازاں اسے لگژری پولیس پٹرولنگ گاڑی میں فیلڈ ٹور کرایا گیا اور یادگار تصاویر بھی بنائی گئیں۔
کیپٹن ماجد نے کہا کہ یہ اقدام دبئی پولیس کے اس وژن کا حصہ ہے جس کا مقصد معاشرے میں مثبت تعلقات کو فروغ دینا اور بچوں میں خوشی، قومی وابستگی اور اعتماد کے احساس کو اجاگر کرنا ہے۔
