دبئی میں ٹریفک قوانین کی خلاف ورزی پر سخت کارروائی کا سلسلہ جاری ہے۔ تازہ ترین واقعے میں ایک ڈرائیور کو ایمرجنسی لین میں تیز رفتاری سے گاڑی چلانے پر گرفتار کر لیا گیا ہے۔
دبئی پولیس کے مطابق، مذکورہ ڈرائیور نہ صرف ایمرجنسی گاڑیوں کے لیے مخصوص لین میں گاڑی چلا رہا تھا بلکہ انتہائی تیز رفتاری کا بھی مظاہرہ کر رہا تھا، جو نہ صرف قانون کی خلاف ورزی ہے بلکہ عوام کی جان کو بھی خطرے میں ڈالنے کے مترادف ہے۔
پولیس حکام نے بتایا کہ ڈرائیور پر 50 ہزار درہم کا بھاری جرمانہ عائد کیا گیا ہے، جو پاکستانی کرنسی میں تقریباً 38 لاکھ روپے بنتا ہے۔ اس کے علاوہ، اس کی گاڑی بھی ضبط کر لی گئی ہے۔ دبئی پولیس نے سخت مؤقف اختیار کرتے ہوئے واضح کیا ہے کہ عوام کی سلامتی کے لیے وضع کیے گئے قوانین کی خلاف ورزی کسی صورت برداشت نہیں کی جائے گی۔
اماراتی ٹریفک قوانین کے تحت، ایمرجنسی لین کا استعمال صرف ایمبولینس، فائر بریگیڈ یا دیگر ہنگامی سروسز کے لیے مخصوص ہے۔ کسی عام ڈرائیور کا اس لین میں داخل ہونا نہ صرف قانونی جرم ہے بلکہ ہنگامی سروسز کی راہ میں رکاوٹ بھی بن سکتا ہے۔
پولیس نے مزید بتایا کہ ضبط شدہ گاڑی کو چھڑوانے کی فیس 1 لاکھ درہم تک ہو سکتی ہے، جو جرمانے کے علاوہ اضافی بوجھ بنے گی۔ دبئی پولیس کی جانب سے شہریوں کو بارہا یاد دہانی کروائی گئی ہے کہ قوانین کی پاسداری کریں، بصورت دیگر نہ صرف جرمانے بلکہ قانونی کارروائی کا سامنا بھی کرنا پڑے گا۔
یاد رہے کہ امارات میں ٹریفک قوانین پر عملدرآمد کو انتہائی سنجیدگی سے لیا جاتا ہے، اور خلاف ورزی کی صورت میں فوری اور سخت ایکشن معمول کی بات ہے۔
