اسرائیلی وزیراعظم کے دفتر کی ترجمان شوش بیڈروسیئن نے واضح کیا ہے کہ غزہ میں بین الاقوامی فورس کے تحت کسی ترک فوجی کو تعینات نہیں کیا جائے گا۔
اسرائیلی اخبار کے مطابق اسرائیل نے اس مؤقف سے امریکا کو بھی آگاہ کر دیا ہے کہ غزہ میں تعینات ہونے والے بین الاقوامی فوجی دستوں میں ترکیے کے فوجی شامل نہیں ہوں گے۔
ترجمان نے صحافیوں سے گفتگو کرتے ہوئے کہا کہ "غزہ کی زمین پر کسی ترک فوجی کا پاؤں نہیں لگے گا”۔ انہوں نے مؤقف اختیار کیا کہ اسرائیل کے لیے ترکیے کی فوجی موجودگی کسی صورت قابلِ قبول نہیں۔
یاد رہے کہ اس سے قبل اسرائیل نے امریکی منصوبے کے تحت غزہ میں ترک فوج کی شمولیت پر بھی اعتراض اٹھایا تھا۔
گزشتہ ماہ ہنگری میں پریس کانفرنس کرتے ہوئے اسرائیلی وزیر خارجہ گیڈیون سار نے کہا تھا کہ جو ممالک غزہ میں فوجی دستے بھیجنے کے خواہاں ہیں، انہیں اسرائیل کے ساتھ منصفانہ رویہ اختیار کرنا چاہیے۔
ان کا کہنا تھا کہ صدر رجب طیب اردوان کی قیادت میں ترکیے نے اسرائیل کے خلاف کھلا دشمنانہ رویہ اپنایا ہے، اس لیے اسرائیل کسی بھی صورت میں ترک فوج کو غزہ کی پٹی میں داخل ہونے کی اجازت نہیں دے گا۔
