بھارتی ریاست مہاراشٹرا میں ایک اسکول ٹیچر باپ نے میڈیکل کے فرضی ٹیسٹ میں کم نمبر آنے پر 12ویں جماعت کی طالبہ بیٹی کو ڈنڈے مار کر قتل کر دیا، پولیس نے ملزم کو گرفتار کر لیا۔
ممبئی، بھارت میں تعلیم کے دباؤ نے ایک اور افسوسناک واقعے کو جنم دیا، جہاں مہاراشٹرا کے گاؤں نیلکرنجی میں ایک سنگدل باپ نے محض فرضی ٹیسٹ میں کم نمبر آنے پر اپنی 17 سالہ بیٹی کو بہیمانہ تشدد کا نشانہ بنا کر قتل کر دیا۔ پولیس کے مطابق واقعہ اس وقت پیش آیا جب 45 سالہ اسکول ٹیچر دھوندی رام بھوسلے اپنی بیٹی سادھنا کی تعلیمی کارکردگی سے مایوس ہو گیا۔
سادھنا، جو 12ویں جماعت کی طالبہ تھی اور میڈیکل میں داخلے کی تیاری کر رہی تھی، حال ہی میں ایک فرضی ٹیسٹ میں شامل ہوئی تھی جس میں اس کے نمبر توقع سے کم آئے۔ یاد رہے کہ سادھنا نے میٹرک میں شاندار 92.60 فیصد نمبر حاصل کیے تھے، مگر میڈیکل ٹیسٹ میں کم کارکردگی نے باپ کے رویے کو ظالمانہ رخ دے دیا۔
پولیس کے مطابق ملزم نے آٹے کی چکی میں استعمال ہونے والی لکڑی کے ہینڈل سے اپنی بیٹی کو بیوی کے سامنے مارنا شروع کیا، جس سے سادھنا شدید زخمی ہو گئی۔ اسے فوری طور پر قریبی اسپتال منتقل کیا گیا تاہم وہ دورانِ علاج دم توڑ گئی۔
حادثے کے بعد مقتولہ کی والدہ نے پولیس میں شکایت درج کروائی جس پر دھوندی رام بھوسلے کو حراست میں لے لیا گیا۔ پولیس کا کہنا ہے کہ ملزم کے خلاف قتل کی دفعات کے تحت مقدمہ درج کر لیا گیا ہے اور مزید تفتیش جاری ہے۔
**یاد رہے کہ** بھارت میں تعلیمی دباؤ اور والدین کی غیرحقیقی توقعات کے باعث ہر سال سینکڑوں نوجوان ذہنی دباؤ، خودکشی یا گھریلو تشدد کا شکار ہوتے ہیں، جس پر ماہرین تعلیم اور نفسیات مسلسل خبردار کرتے آ رہے ہیں۔ اس واقعے نے ایک بار پھر تعلیمی نظام اور گھریلو رویوں پر سنجیدہ سوالات اٹھا دیے ہیں۔
