نئی دہلی، بھارتی میڈیا کی فیک نیوز پر عوامی غصے کے بعد حکمران جماعت بھارتیہ جنتا پارٹی (بی جے پی) نے میڈیا کا دفاع کرنے کیلئے خود میدان سنبھال لیا۔
سوشل میڈیا پر جاری ایک ویڈیو پیغام میں بی جے پی کی جانب سے بھارتی عوام کو ذہنی طور پر کمزور قرار دیتے ہوئے کہا گیا ہے کہ موجودہ دور میں جنگ صرف سرحدوں پر نہیں بلکہ سوشل میڈیا اور ذہنی محاذوں پر بھی لڑی جاتی ہے اور اس میں عوام کا کردار اہم ہے۔
ویڈیو میں کہا گیا ہے کہ اگر جنگ کے دوران بھارتی میڈیا سے کوئی غلط خبر نشر ہوگئی تو اسے دشمنی کیوں سمجھا جا رہا ہے؟ کیا کسی نیوز چینل نے بھارت کے خلاف رپورٹنگ کی ہے؟
بی جے پی نے اپنے بیان میں افسوس کا اظہار کرتے ہوئے کہا کہ بھارتی شہری پاکستانی پروپیگنڈے کا شکار ہو کر اپنے میڈیا کو ہی غدار قرار دے رہے ہیں۔
یاد رہے کہ حالیہ بھارتی اشتعال انگیزی کے بعد میدان جنگ میں پاک فوج کے مؤثر جواب سے مودی حکومت بوکھلاہٹ کا شکار ہوگئی تھی، جس کے بعد اپنی عوام کو گمراہ کرنے کیلئے فیک نیوز اور پروپیگنڈے کا سہارا لیا گیا۔
دوسری جانب جھوٹی خبروں پر پاکستانی سوشل میڈیا صارفین نے بھارت کو آڑے ہاتھوں لیتے ہوئے میمز اور تنقیدی تبصروں سے سوشل میڈیا پر طوفان برپا کر دیا۔
