کینبرا: آسٹریلیا کے وزیراعظم انتھونی البانیز نے اپنی دیرینہ دوست جوڈی ہیڈن سے پانچ سالہ تعلق کے بعد شادی رچا لی ہے۔ غیر ملکی میڈیا کے مطابق یہ پہلا موقع ہے کہ کوئی آسٹریلین وزیراعظم اپنے عہدے کے دوران شادی کر رہا ہے۔ شادی کی تقریب کینبرا میں ہوئی اور تاریخ خفیہ رکھی گئی۔
انتھونی البانیز اور جوڈی ہیڈن کی ملاقات 2020 میں ایک تقریب کے دوران ہوئی تھی اور وقت کے ساتھ دونوں قریب آتے گئے۔ 2022 اور 2025 کی انتخابی مہموں کے دوران جوڈی ہیڈن اہم مواقع اور بین الاقوامی دوروں میں انتھونی البانیز کے ہمراہ نظر آئیں۔
گزشتہ برس فروری میں ویلنٹائن ڈے پر انتھونی البانیز نے شادی کی پیشکش کی، جسے جوڈی نے قبول کر لیا۔ شادی کے بعد دونوں نے مشترکہ بیان میں کہا کہ اپنی محبت اور مستقبل کو ایک ساتھ گزارنے کے عزم کا اعلان رشتہ داروں اور قریبی دوستوں کے سامنے کرتے ہوئے بے حد خوشی محسوس کر رہے ہیں۔
