دبئی ایئر شو میں بھارتی لڑاکا طیارے ’’تیجس‘‘ کے گر کر تباہ ہونے کے بعد آرمینیا نے اس طیارے کی مجوزہ خریداری کا عمل معطل کر دیا ہے۔ آرمینیا اور بھارت کے درمیان تقریباً 1.2 بلین ڈالر مالیت کے 12 تیجس طیاروں کی خریداری پر مذاکرات جاری تھے، اور یہ سودا طے پانے کی صورت میں تیجس کی پہلی بڑی بین الاقوامی برآمد قرار پاتا۔
غیر ملکی میڈیا رپورٹس کے مطابق آرمینیا نے حادثے کے بعد طیارے کی تکنیکی ساکھ اور قابلِ اعتماد ہونے پر سوالات اٹھائے، جس کے باعث خریداری کا فیصلہ مؤخر کر دیا گیا ہے۔
رپورٹس میں یہ بھی بتایا گیا ہے کہ خریداری معطل ہونے سے اسرائیل ایرو اسپیس انڈسٹریز کو بھی بڑے مالی نقصان کا سامنا ہو سکتا ہے، کیونکہ تیجس میں نصب کیے گئے ریڈار سمیت متعدد جدید آلات اسرائیل میں تیار کیے گئے ہیں، جن کی مالیت دسیوں ملین ڈالر بتائی جاتی ہے۔
یاد رہے کہ 21 نومبر کو دبئی ایئر شو کے دوران بھارت کا ہلکا جنگی طیارہ ’’تیجس‘‘ مظاہرے کے دوران گر کر تباہ ہوگیا تھا، جس کے نتیجے میں پائلٹ ہلاک ہوگیا تھا۔ حادثے نے نہ صرف بھارت کے دفاعی ایوی ایشن پروگرام بلکہ ممکنہ برآمدی سودوں پر بھی اثر ڈالا ہے۔
