کنسرٹ میں ایچ آر ہیڈ کے ساتھ بغلگیر ہونے کی ویڈیو وائرل ہونے پر اینڈی بائرن نے استعفیٰ دے دیا، بورڈ نے منظوری دے دی
امریکی ٹیکنالوجی کمپنی ایسٹرونومر کے چیف ایگزیکٹو آفیسر اینڈی بائرن کو ایک میوزک کنسرٹ کے دوران کمپنی کی ہیڈ آف ہیومن ریسورسز، کرسٹین کیبوٹ کے ساتھ غیر رسمی اور مشتبہ انداز میں بغلگیر ہوتے دیکھا گیا، جس کی ویڈیو وائرل ہونے کے بعد انہیں اپنا عہدہ چھوڑنا پڑا۔
ایسٹرونومر کے بورڈ کی جانب سے جاری کردہ بیان میں تصدیق کی گئی کہ اینڈی بائرن نے اپنا استعفیٰ پیش کر دیا ہے، جسے بورڈ نے قبول کر لیا۔
یہ واقعہ اس وقت منظرِ عام پر آیا جب کنسرٹ کے دوران ایک کیمرہ سامعین پر گھوما تو اینڈی بائرن اور کرسٹین کیبوٹ کو بغلگیر دکھایا گیا۔ دونوں کیمرہ دیکھتے ہی بوکھلاہٹ کا شکار ہو گئے۔ اینڈی بائرن نیچے جھک گئے جبکہ کرسٹین نے کیمرے سے نظریں چراتے ہوئے منہ دوسری جانب موڑ لیا، لیکن اس کوشش کے باوجود ویڈیو کلپس وائرل ہو گئیں۔ واقعے کے بعد کمپنی نے اینڈی بائرن کو چھٹیوں پر بھیج دیا اور اندرونی تحقیقات شروع کیں۔
ذرائع کے مطابق یہ واقعہ کمپنی کی اخلاقی پالیسیوں کی ممکنہ خلاف ورزی کے دائرے میں آتا ہے، جس کے باعث انتظامیہ نے سخت قدم اٹھاتے ہوئے استعفیٰ طلب کیا۔
یاد رہے کہ امریکی کارپوریٹ اداروں میں دفتر کے اندر غیر پیشہ ورانہ تعلقات کو سختی سے دیکھا جاتا ہے، اور متعدد اعلیٰ عہدیداران کو ایسے الزامات کے بعد اپنے عہدوں سے ہاتھ دھونا پڑا ہے۔
