ای کامرس کی بڑی کمپنی ایمازون نے دنیا بھر میں اپنے کارپوریٹ اسٹاف میں شامل 14 ہزار ملازمین کو فارغ کرنے کا اعلان کیا ہے۔ کمپنی کے مطابق یہ قدم مصنوعی ذہانت (AI) کے بڑھتے استعمال اور انتظامی ڈھانچے کو سادہ بنانے کے لیے اٹھایا گیا ہے۔
ایمازون نے بتایا کہ اس اقدام کا مقصد بیوروکریسی کم کرنا، اضافی انتظامی سطحیں ختم کرنا اور وسائل کو کمپنی کے اہم منصوبوں کی طرف منتقل کرنا ہے۔ سینئر نائب صدر بیتھ گلیٹی کے مطابق، ایمازون آئندہ برس بھی بھرتیوں کو “انتخابی بنیادوں پر” جاری رکھے گا، یعنی بعض شعبوں میں کمی اور دیگر میں نئی بھرتیاں کی جائیں گی۔
رپورٹس کے مطابق، کورونا وبا کے دوران کمپنی نے ضرورت سے زیادہ ملازمین بھرتی کیے تھے، جنہیں اب بتدریج کم کیا جا رہا ہے۔ گزشتہ سال کے آخر میں ایمازون کے کل ملازمین کی تعداد 15 لاکھ 60 ہزار سے زائد تھی، جن میں سے تقریباً 3 لاکھ 50 ہزار کارپوریٹ شعبے میں کام کر رہے تھے۔
متاثرہ ملازمین کو 90 روز کا وقت دیا جائے گا تاکہ وہ کمپنی کے اندر کسی نئی پوزیشن کے لیے درخواست دے سکیں اور بھرتی میں ترجیحی بنیادوں پر دیکھا جائے۔
سی ای او اینڈی جیسی نے کہا کہ کمپنی مستقبل میں جنریٹیو AI پر زیادہ انحصار کرے گی، جس سے انسانی افرادی قوت کی ضرورت کم ہو جائے گی۔ کمپنی اس سال 118 ارب ڈالر کی سرمایہ کاری کرے گی، جس کا بڑا حصہ کلاؤڈ اور AI انفراسٹرکچر پر خرچ ہوگا۔
