طیارہ ساز کمپنی ائیربس نے اے320 طیاروں کا سافٹ ویئر فوری طور پر اپ ڈیٹ کرنے کا فیصلہ کرلیا ہے، جس کے باعث دنیا بھر میں تقریباً 6 ہزار طیارے متاثر ہو سکتے ہیں۔
کمپنی کا کہنا ہے کہ حالیہ حادثے سے پتہ چلا کہ سولر ریڈی ایشن ڈیٹا میں نقصانات کنٹرول سسٹم پر اثر ڈال سکتے ہیں، جس کی وجہ سے طیارے کی پرواز خطرے میں پڑ سکتی ہے۔
خبر ایجنسی کے مطابق 30 اکتوبر کو میکسیکو سے نیوجرسی جانے والی ایک پرواز کے دوران طیارہ اچانک بلندی کھو کر نیچے آیا، جس کے نتیجے میں کئی مسافر زخمی ہوئے۔
ائیربس کی جانب سے سافٹ ویئر اپ ڈیٹ کے فیصلے کے بعد امریکن ائیر لائنز، ڈیلٹا ائیر لائنز، ائیر نیوزی لینڈ اور ترکیش ائیرلائنز سمیت کئی کمپنیوں نے پروازوں میں ممکنہ خلل کے حوالے سے انتباہ جاری کیا ہے۔
آسٹریلین ائیرلائن نے بیان میں کہا کہ سافٹ ویئر اپ ڈیٹ کے باعث کچھ پروازیں شیڈول کے مطابق نہیں چل سکیں گی، جبکہ سعودی ائیرلائن نے بھی بتایا کہ تکنیکی بحالی کی وجہ سے بعض پروازوں میں تاخیر ہو رہی ہے۔
ادھر برطانوی ایوی ایشن اتھارٹی نے بھی خدشہ ظاہر کیا ہے کہ ائیربس کے سافٹ ویئر اپ ڈیٹ کے فیصلے سے بین الاقوامی پروازوں کا شیڈول متاثر ہو سکتا ہے۔
